कतार (हाम्रो खेलकुद) – फिफा विश्वकप कतार २०२२ अन्तर्गत समूह चरणको पहिलो खेलमा ब्राजिलियन स्टार नेयमार घाइते हुँदै बाहिरिए । एंकलमा चोट लागेका उनले कम्तिमा समूह चरणको खेल गुमाउने बुझिएको छ । आक्रमणमा पर्याप्त खेलाडी रहेको ब्राजिलका प्रशिक्षक नेयमारको अनुपस्थिति र टोलीमा विकल्पबारे यसो भन्छन् :

‘फुटबल भनेको अवस्था अनुसार खेलिने खेल हो । तपाईंले विपक्षी टोलीअनुसार आफ्नो रणनीतिमा परिवर्तन गर्नुपर्छ । हामीले पनि अवश्य केहि परिवर्तन गर्नेछौं ।’

‘यसपटक हामीसँग नेयमार छैनन् । तर इतिहास हेर्ने हो भने हामीले यसअघि पनि यस्तो समस्या भोगेका छौं । दबाबको समयमा हामीले मैदानमा खेलाडी परिवर्तन गर्नेछौं । तर हामीले अब यहाँबाट टोली परिवर्तन गर्ने छैनौं ।’

‘ड्यानीलो र नेयमारले आफूले सकेको खेले । ड्यानिलोले त चोटका बाबजुद खेले, मैले उनलाई परिवर्तन नगरेर गल्ती गरेकै हो । हाम्रो ५ खेलाडी परिवर्तन भइसकेको थियो र ड्यानिलोले अन्त्यसम्म साथ दिए । उनले जे गरे, त्यो फुटबल र नतिजाभन्दा माथि थियो ।’

‘मलाई विश्वास छ नेयमार र ड्यानिलोले विश्वकपमा खेल्नेछन् । स्वास्थ्य स्थिति हेर्दा मैले धेरै भन्न सक्दिन । तर हामीले लगातार हाम्रो स्वास्थ्य टोलीसँग छलफल गरेका छौं । चांडो भन्दा चांडो प्रशिक्षणमा फर्केर तयार हुने अपेक्षा छ ।’

‘नेयमार घाइते भएपनि अन्य खेलाडी छन् । याद राख्नुस हामीसँग २६ खेलाडी छन् । टोलीमा सबैको महत्त्व छ ।’

‘हो म मान्छु नेयमार उत्कृष्ट खेलाडी हुन् । तर ब्राजिल उनीमा मात्र भर परेको छैन । हामीले तयारी गर्दा पनि त्यो अनुसार नै गरेका छौं । सबै खेलाडीको खेल्ने शैली फरक हुन्छ । तर नेयमारको अनुपस्थितिमा उक्त भूमिकामा खेल्न अन्य खेलाडी तयार छन् ।’