सुबास हुमागाईं, कतार

फिफा विश्वकप कतार २०२२ मा उपाधिको दावेदार मानिएको अर्जेन्टिनाले पहिलो खेलमा हार बेहोर्दै खराब सुरुवात गर्यो । साउदी अरेबियासँग पराजित भएको अर्जेन्टिना दोस्रो खेलमा मेक्सिकोसँग पराजित भएको अवस्थामा समूह चरणबाटै बाहिरिने डर छ । लिओनेल मेस्सीका लागि सारा अर्जेन्टिनी समर्थक मात्र नभएर अन्य देशबाट फुटबल प्रेमी अर्जेन्टिनी जितको अपेक्षामा रहँदा एक अर्जेन्टिनीको लक्ष्य भने आफ्नै देशलाई हराउनु हुनेछ ।

मेक्सिकोको राष्ट्रिय टोलीका प्रशिक्षक जेरार्डो मार्टिनो अर्जेन्टिनामा जन्मिएका हुन् । खेलाडीको भूमिकामा अर्जेन्टिनाको सिनियर राष्ट्रिय टोलीबाट समेत खेलेका उनले सन् २०१३ मा अर्जेन्टिनाको राष्ट्रिय टोलीको प्रशिक्षण पनि सम्हालेका थिए । उनी प्रशिक्षक रहँदा अर्जेन्टिनाले कोपा अमेरिकामा लगातार दुई पटक चिलीविरुद्ध फाइनलमा हार बेहोरेको थियो । शनिबार मेक्सिको र अर्जेन्टिना भिड्दा उनी अर्जेन्टिनालाई हराउने लक्ष्य बोकेका सम्भवत: एक्लो अर्जेन्टिनी हुनेछन् ।

खेलअघि प्रशिक्षक मार्टिनोले अहिलेलाई आफ्नो लक्ष्य मेक्सिकोको टोलीलाई कसरि राम्रो नतिजा दिलाउने भन्ने रहेको बताए । ‘फुटबलमा यस्तो अवस्था पनि आउने रहेछ । मलाई थाहा छ भोलीको खेल दुवै टोलीका लागि कति महत्त्वपूर्ण छ । दुवै टोलीको विश्वकप भविष्य यस खेलको नतिजासँग जोडिएको छ । जब समूह चरणको ड्र भयो, मैले यो अवस्था आउँछ भन्ने सोचेको पनि थिइनँ । म अहिले मेक्सिकोको प्रशिक्षक छु र मेक्सिकोकै राम्रोको लागि काम गर्नेछु,’ उनले भने ।

६० वर्षीय प्रशिक्षक सन् २०१९ देखि अर्जेन्टिनाका प्रशिक्षक रहेका थिए । उनले जिम्मेवारी लिएपछि सन् २०१९ मा मैत्रीपूर्ण खेलमा मेक्सिको विरुद्ध खेलिसकेका छन् । उक्त खेलमा लौटारो मार्टिनेजको ह्याट्रिकमा अर्जेन्टिनाले ४-० को जित हासिल गरेको थियो । तर यसपटक मेक्सिको राम्रो अवस्थामा रहेको र जितका लागि नै खेल्नेमा मार्टिनो बताउँछन् ।

‘मलाई थाहा छ अर्जेन्टिनी भएको हिसाबले यो सहज छैन । तर तपाईं पनि मेरो अवस्थामा हुनुभएको भए यहि सोच्नुहुन्थ्यो । मेक्सिकोले जित्नुपर्छ र यसको विकल्प छैन । मलाई अर्जेन्टिनामा कहाँ जन्मिएको, कुन अस्पतालमा जन्मिएको र अर्जेन्टिना कस्तो छ थाहा छ । तर अहिले म मेक्सिकोको जिम्मेवारीमा छु । सुखद नतिजा निकालेर अर्को चरणको सोचमा छौं ।’

अर्जेन्टिनी कप्तान लिओनेल मेस्सी र मार्टिनोले यसअघि क्लब र राष्ट्रिय टोली दुवैमा सँगै काम गरेका छन् । सन् २०१३ मा बार्सिलोनाको प्रशिक्षक रहँदा र त्यसपछि मार्टिनोले मेस्सीलाई प्रशिक्षण दिएका थिए । मार्टिनोले मेस्सीविरुद्ध आफ्नो टोली पूरै ९० मिनेट चनाखो रहनुपर्ने बताए ।

‘मेस्सीविरुद्ध खेल्ने जुनसुकै टोलीले पनि उनीबारे सोचेको हुन्छ । उनलाई रोक्ने भनेको हाम्रो रणनीति सफल हुने भन्दापनि उनको प्रदर्शन कस्तो हुन्छ भन्नेमा भर पर्छ । उनीविरुद्ध हामीले सधैं तयार रहनुपर्छ । मेस्सीले उत्कृष्ट प्रदर्शन गर्न सक्छन् भन्ने सोचेर नै तयारी गर्ने हो,’ मार्टिनोले भने ।

‘हामीले मेस्सीलाई लिएर हल्का सोच्ने छैनौं । उनले खेलको ९० मिनेट पूरा नखेलेको अवस्थामा पनि मात्र ५ मिनेटमा खेलको रुप बदल्न सक्छन् । त्यसैले हामीले खेल अवधिभर चनाखो रहनुपर्छ । उनीमाथि ध्यान राख्नुपर्छ ।’

फिफा विश्वकपमा अर्जेन्टिना र मेक्सिकोबीच यसअघि तीन पटक भेट भएको छ । अर्जेन्टिनाले यसअघि तीन पटक नै जित हासिल गरेक छ । यसअघि सन् २०१० मा अर्जेन्टिनाले ३-१ ले मेक्सिकोलाई हराउँदा कार्लोस टेभेजले २ तथा गोन्जालो हिगुआइनले १ गोल गरेका थिए । समग्र अन्तर्राष्ट्रिय फुटबलमा भने ३० खेलमा अर्जेन्टिना १५ र मेक्सिको ४ पटक विजयी भएका छन् ।

मेक्सिकोले अर्जेन्टिनालाई पराजित गरेको अवस्थामा अर्जेन्टिना समूह चरणबाट बाहिरिनेछ । बराबरीले भने झिनो अंक गणितीय सम्भावना जीवित हुनेछ । मेक्सिकोले अर्जेन्टिनालाई पराजित गरेमा नकआउट चरणमा पुग्ने सम्भावना बलियो हुनेछ ।