एजेन्सी – ब्राजिली स्टार फरवार्ड नेयमारसँगै डिफेन्डर डानिलोले कतारमा जारी फिफा विश्वकपको समूह चरणका बाँकी दुई खेल गुमाउने भएका छन् ।

सर्वियाविरुद्ध २–० को जित निकालेको खेलमा नेयमारले दाया खुट्टामा चोट बोक्दै मैदानबाट बाहिरिनु परेको थियो । ब्राजिली टोलीका चिकित्सक रोड्रिगो लास्मारले नेयमारले कम्तीमा पनि दुई खेल गुमाउने बताएका छन् ।

सर्वियन डिफेन्डर निकोला मिलेन्कोभिचको ट्याकलका कारण एंकलमा चोट बोकेपछि नेयमारलाई ८०औं मिनेटमा परिवर्तन गरिएको थियो । नेयमार परिवर्तन गरेपछि बेन्च पुग्दा रोइरहेको देखिन्थे । उपचारको क्रममा नेयमार अनुहार छोपेर बसेका थिए र तस्वीरमा उनको दाहिने खुट्टा सुन्निएको देखाइएको थियो ।

यस्तै राइट ब्याक ड्यानिलोले पनि खुट्टाको चोटकै कारण अर्को दुई खेल गुमाउने छन् । ब्राजिलले सोमबार स्वीट्जरल्यान्डसँग तथा शुक्रबार क्यामरुनसँग खेल्ने तालिका छ । ब्राजिल दुवै खेलाडी नकआउट चरणका लागि मैदानमा फर्कने विश्वासमा छ । तर, त्यसका लागि ब्राजिलले समूह चरण पार गर्नुपर्ने हुन्छ ।

‘नेयमार र डानिलोले शुक्रबार एमआरआई गराएका थिए र हामीले दुबैको खुट्टामा लिगामेन्टमा क्षति भएको देख्यौं ।’ ब्राजिल टोलीका चिकित्सक रोड्रिगो लास्मारले भने, ‘यो खासै ठुलो समस्या होइन । केही दिन आराम गर्नुपर्ने हुन्छ । उनीहरु यसै साताभित्र नै खेलमा फर्किनेछ ।’

सर्वियाविरुद्धको जितपछि ब्राजिलका मुख्य प्रशिक्षक टिटेले नेयमारले आगामी खेल खेल्न सक्नेमा विश्वस्त थिए । तर, एमआरआई रिपोर्टमा उनीहरुले कम्तीमा पनि एक साता आराम गर्नुपर्ने भएको छ ।

फ्रान्सेली क्लब पेरिस सेन्ट जर्मेनका फरवार्ड नेयमारले विगत केही वर्षयता सोही स्थानमा चोट बोक्दा मैदान बाहिर रहेका थिए । उनले २०१९ कोपा अमेरिका र २०२१ मा पनि केही खेल गुमाएकाथिए ।

नेयमार जारी विश्वकपको एकै खेलमा सर्वाधिक फल गरिएका खेलाडी पनि बने । सर्बियाविरुद्ध ८० मिनेट मैदानमा रहँदा उनीविरुद्ध ९ फल भएको थियो ।