कतार (हाम्रो खेलकुद) – फिफा विश्वकप कतार २०२२ अन्तर्गत समूह ए को खेलमा सेनेगलले आयोजक कतारलाई पराजित गरेको छ । अल थुमामा रंगशालामा सेनेगलले ३-१ को जित दर्ता गरेको हो ।

पहिलो हाफको अन्त्यतिर अग्रता लिएको सेनेगलले दोस्रो हाफको सुरुवातमै गोल थपेको थियो । तर मोहमद मुन्टारीले कतारका लागि विश्वकप इतिहासकै पहिलो गोल गर्दै खेलमा फर्कने संकेत दिए । थकित डिफेन्सविरुद्ध वैकल्पिक खेलाडी बाम्बा डीएङले गोल थप्दै सेनेगललाई जित दिलाए । यस जितसँगै सेनेगल जारी विश्वकपमा जित हासिल गर्ने पहिलो अफ्रिकी टोली बनेको छ ।

खेलको ४१ औं मिनेटमा डियाले गोल गर्दै सेनेगललाई अघि बढाए । क्रेप्लिन डियाट्टाले पेनाल्टी क्षेत्र बाहिरबाट गरेको प्रहार डिफेन्डर बौअलेम खौखीले बचाए । तर क्लिअरेन्स गर्ने प्रयासमा उनी लड्न पुग्दा बौलाए डियाले गोल गर्दै घरेलु समर्थकलाई निराश बनाए ।

दोस्रो हाफको सुरुवातमै सेनेगलले अग्रता दोब्बर पार्यो । ४८ औं मिनेटमा फामारा देधिउले गोल कर्नरमा हेडरमार्फत गोल गरे । इस्माइल जेकब्सको कर्नरमा उनले ६ यार्ड बक्सबाट बललाई पोस्टको दिशा दिएका थिए ।

६३ औं मिनेटमा गोलरक्षक एडुआर्ड मेन्डीले कतारका फरवार्ड अल्मोएज अलीको प्रहारलाई विफल पार्दै सेनेगलको अग्रता घट्न दिएनन् ।

७८ औं मिनेटमा कतारका लागि मोहमद मुन्टारीले गोल गर्दै खेलमा फर्कने संकेत दिए । इस्माइल मोहमदको क्रसमा वैकल्पिक खेलाडीको रुपमा मैदान छिरेका मुन्टारीले हेडरमार्फत गोल गरे । यो गोल कतारले विश्वकप इतिहासमा गरेको पहिलो गोल पनि हो ।

८४ औं मिनेटमा बाम्बा डीएङले गोल गर्दै क्यामरुनको दुई गोलको अग्रता पुन: स्थापना गरे । बारोय एनडीआएको पासलाई बाम्बाले पहिलो टचमा नै गोल गर्दै जित सुनिश्चित गरे ।

यस जितसँगै सेनेगलले नकआउट चरणमा पुग्ने सम्भावना जीवित राखेको छ । समूहमा नेदरल्यान्ड्स, इक्वेडर र सेनेगलको ३-३ अंक छ । आज हुने खेलमा नेदरल्यान्ड्स र इक्वेडर भिड्दैछन् । दुवै खेलमा हार बेहोरेको कतार अंकविहिन छ ।