कतार (हाम्रो खेलकुद) – फिफा विश्वकप कतार २०२२ अन्तर्गत समूह एच मा ब्राजिलले विजयी सुरुवात गर्यो । फरवार्ड रिचार्लीसनको दुई गोलमा सर्बियालाई २-० ले पराजित गर्दै ब्राजिलले ३ अंक जोड्यो । तर खेलपछि चर्चाको विषय भने नेयमार रहे ।

सर्बियाका डिफेन्डर निकोला मिलेन्कोभिचको ट्याकलका कारण एंककलमा चोट बोकेपछि नेयमारलाई ८० औं मिनेटमा परिवर्तन गरिएको थियो । नेयमार परिवर्तन गरेपछि बेन्च पुग्दा रोइरहेको देखिन्थे । बेन्चमा रहँदा उनले निरन्तर आइस लगाए । खेलपछि मैदान छाड्ने क्रममा उनको दायाँ खुट्टा एंकल सुन्निएको थियो ।

खेलपछि बोल्दै ब्राजिलका टिम डाक्टर रोड्रीगो लास्मारले नेयमारको अवस्थाबारे अहिले केहि भन्न नसकिने बताए । उनले शुक्रबार सुन्निएको बसेपछि थप परिक्षण गरेर मात्र चोटको प्रकृतिबारे थाहा हुने बताए ।

यता ब्राजिलका प्रशिक्षक टिटेले नेयमारका लागि विश्वकप समाप्त नभएको बताए । ‘हामी विश्वस्त छौं नेयमारले विश्वकपमा खेल्नेछन् । ‘हामीलाई विश्वास छ नेयमारले विश्वकपमा खेल्नेछन्,’ नेयमारको चोटबारे उनले भने, ‘मैले सुरुवातमा उनलाई चोट लागेको देखेको थिइनँ । उनले कति सम्म थेग्न सक्छन् भन्ने म आफैं सोच्न सक्दिन ।’

नेयमारको दायाँ खुट्टाको एंकलले यसअघि पनि दुख दिएको इतिहास छ । सन् २०१९ मा कोपा अमेरिका दौरान पनि उनलाई सोहि चोटले सताएको थियो । सन् २०२१ मा पनि उनी केहि साता मैदानबाहिर थिए । नेयमार जारी विश्वकपको एकै खेलमा सर्वाधिक फल गरिएका खेलाडी पनि बने । सर्बियाविरुद्ध ८० मिनेट मैदानमा रहँदा उनीविरुद्ध ९ फल भएको थियो ।