कतार (हाम्रो खेलकुद) – पोर्चुगलका प्रशिक्षक फर्नान्डो सान्तोसले फिफा विश्वकप कतार २०२२ अन्तर्गत घानाविरुद्ध जितपछि डिफेन्सको प्रदर्शनबाट आफू सन्तुष्ट नरहेको बताएका छन् ।

सान्तोसलले खेलपछि पत्रकार सम्मेलनमा बोल्दै आफ्नो टोलीले अझ राम्रो खेल्न सक्ने बताए । ‘हामीले खेलमा पाएको अवसर सदुपयोग गर्न सकेनौं । हामीसँग भएका खेलाडीले अझ राम्रो खेल्न सक्छन् । खेलमा अझ राम्रो पकड बनाउन सक्नुपर्ने थियो । तर आज घानाले राम्रो प्रदर्शन गर्यो । दोस्रो हाफमा हामीले रक्षात्मक रुपमा थप ध्यान दिएका थियौं । यसैले जित सम्भव भएको हो,’ उनले भने ।

घानाका प्रशिक्षक ओटो अद्दोले पोर्चुगलविरुद्ध खेलमा रेफ्रीले आफ्नो पक्षमा निर्णय नदिएको कारण नै हार बेहोरेको बताउँदै रोनाल्डोलाई रेफ्रीले पेनाल्टी उपहार दिएको बताएका थिए । यसबारे भने आफू बोल्न नचाहेको सान्तोसले प्रष्ट पारे । ‘म घानाका प्रशिक्षकले के भने त्यसबारे बोल्न चाहन्न । उनले आफ्नो धारणा राख्न पाउँछन् । रेफ्री र भीएआरले आफ्नो जिम्मेवारी निर्वाह गर्छन्,’ उनले थपे ।

‘रेफ्रीको निर्णयबारे म केहि भन्दिन । सबैको आ-आफ्नो धारणा हुन्छ । सामाजिक संजालमा के आउँछ भन्ने सोचेर हुँदैन । मेरो विचारमा पनि फेलिक्ससँगको घटना भीएआरले हेर्नुपर्ने थियो । रेफ्री र भीएआरबारे हामीले केहि भन्नुपर्ने अवस्था हुँदैन । रेफ्री र भीएआरलाई आफ्नो जिम्मेवारी राम्रो थाहा छ ।’

सान्तोसले घानाले गरेको दुई गोलबारे अध्ययन गर्ने बताए । ‘म हामीले खाएको दुई गोलबाट खुसी छैन । हामीले यसबारे अध्ययन गर्नुपर्छ । आजको खेलबारे हामी पुन: छलफल गर्नेछौं । तर आजको प्रदर्शनबाट सन्तुष्ट हुने अवस्था छैन,’ सान्तोसले बताए ।

‘घानाको खेल्ने शैलीबारे हामी जानकार थियौं । उनीहरुले कस्तो खेल्छन् भन्ने ब्राजिल र स्विटजरल्यान्डविरुद्ध खेलेको भिडियो हेरेर हामी तयार गरेका थियौं । र आज त्यसै अनुसार खेलेको थियो ।’

सान्तोसले रोनाल्डो विश्व फुटबलकै महान खेलाडी रहेको र उनले हासिल गरेको उपलब्धि वर्षौंसम्म चर्चामा रहने बताए । ‘रोनाल्डोबारे मान्छेको आ-आफ्नो धारणा हुन्छ । मेरो विचारमा रोनाल्डो फुटबलकै महान खेलाडीमा पर्छन् । आजको ५० वर्षपछि रोनाल्डोको बारेमा चर्चा हुनेछ । उनको स्तरबारे उनले पाएको सफलताले पनि प्रष्ट पारेको छ,’ उनले टुंग्याए ।

यो पनि : ‘रोनाल्डोले रेफ्रीबाट पेनाल्टी उपहार पाए’ – घानाका प्रशिक्षक ओटो