एजेन्सी – फिफा विश्वकप कतार २०२२ अन्तरगत आज (बिहीबार) समूह ‘जी’ र ‘एच’ का विभिन्न चार खेलमा प्रतिस्पर्धा हुँदैछ । यससँगै समूह चरणको पहिलो राउन्डको खेल सकिनेछ ।

आज उपाधिको दावेदारको रुपमा हेरिएको पोर्चुगलले अफ्रिकी प्रतिद्धन्द्धी घानाको सामना गर्दैछ । खेल नेपाली समयअनुसार राति ९ः४५ बजे स्टेडियम ९७४ मा हुनेछ । स्टार र चर्चित खेलाडीले भरिएको पोर्चुगल घानालाई हराएर विश्वकपमा सुखद् नतिजा निकाल्ने लक्ष्यमा हुनेछ ।

टोलीसँग भेट्रान फरवार्ड क्रिस्टियानो रोनाल्डो, ब्रुनो फर्नान्डेस, बर्नाडो सिल्भा, राफायल लियो, रुवेन नेभेस, विलियम कार्भाल्हो, नुनो मेन्डेस, रुवेन डियास, जोओ क्यान्सेलो र गोलरक्षक डिएगो कोस्टा रहेका छन् । यसबाहेक टोलीसँग आन्द्रे सिल्भा, जोआओ फेलिक्स, भिटिन्हा, जोओ मारियो, डिएगो डालोट, राफयल गुरेइरो, पेपे र रुई प्याट्रिसियो पनि रहेका छन् ।

यता, यस विश्वकपमा दुई अप्रत्यासित नतिजा निस्किसक्दा घाना पनि पोर्चुगललाई स्तब्ध पार्ने लक्ष्यमा हुनेछ । टोलीसँग इनाकी विलियम्स, मोहम्मद कुडुस, जोर्डन एयु, तरिक लाम्टे र थोमस पार्टेलगायतको नाम चलेका खेलाडीको साथ छ ।

पोर्चुगलको पछिल्ला खेलमा राम्रो नतिजा निकाल्न सकेको छैन । पछिल्लो चार खेलमा पोर्चुगलले २ जित र २ हारको नतिजा निकालेको छ । यस्तोमा पोर्चुगल घानालाई हराएर जितको लयमा फर्कन चहान्छ ।

यि दुई टोलीले पछिल्लोपटक २०१४ को विश्वकपमा समूह चरणमै प्रतिस्पर्धा गर्दा पोर्चुगल २–१ ले विजयी भएको थियो । पोर्चुगल सोही जितलाई निरन्तरता दिने लक्ष्यमा रहँदा घाना उक्त हारको बदला लिने योजनामा हुनेछ ।