कतार (हाम्रो खेलकुद) – बेल्जियमका मिडफिल्डर केभिन डे ब्रुएन फिफा विश्वकप कतार २०२२ अन्तर्गत क्यानडाविरुद्ध समूह चरणको खेलमा प्लेयर अफ द म्याच चुनिए । तर उनले खेलपछि आफू उक्त अवार्डका लागि हकदार नभएको बताए ।

बेल्जियमले क्यानडालाई १-० ले पराजित गर्दै विश्वकपमा विजयी सुरुवात गर्यो । मिसी बासुआइले दोस्रो हाफमा गरेको गोल नै खेलमा निर्णायक सावित भयो । खेलको अधिकांश समय भने क्यानडा नै हावी देखिएको थियो । बल पोसेसनसँगै आक्रमण बुनेको क्यानडाले फिनिसिङमा भने निकै गल्ति गर्यो । केहि अवसरमा गोलरक्षक थिबाउट कोर्टुवा बाधक बने । तर डे ब्रुएनले प्लेयर अफ द म्याच पाएपछि आफू हकदार नभएको बताए ।

‘मलाई लाग्दैन मैले राम्रो खेलें । मैले किन प्लेयर अफ द म्याच पाएँ पनि थाहा छैन,’ उनले अवार्ड ग्रहण गरेपछि भने, ‘हुनसक्छ मेरो नामको कारण दिइएको हो । तर क्यानडाले निकै राम्रो खेल्यो ।’

‘हामीले राम्रो खेलेनौं । अब के परिवर्तन गर्नुपर्छ भन्ने पनि हामीलाई थाहा छ । हामीले सटिक रुपमा खेल्न सकेनौं । ठूलो प्रतियोगितामा पहिलो खेल सधैं महत्त्वपूर्ण हुन्छ । हामीले आफैंलाई कठिन समय दिएको महसुस गरें,’ डे ब्रुएनले भने ।

बेल्जियमले अब समूहको दोस्रो खेलमा आइतबार मोरोक्कोसँग खेल्नेछ । आज भएको खेलमा क्रोएसिया र मोरोक्को गोलरहित बराबरीमा रोकिएका थिए ।