कतार (हाम्रो खेलकुद) – फिफा विश्वकप २०२२ अन्तर्गत समूह सी को पहिलो खेलमा मंगलबार अर्जेन्टिनाले साउदी अरबको सामना गर्दैछ । खेल नेपाली समयअनुसार दिउँसो ३:४५ बजे लुसेल रंगशालामा हुनेछ ।

कतार विश्वकपमा पहिलो खेलको पूर्व सन्ध्यामा कप्तान मेस्सीले आफू खेलका लागि तयार रहेको बताए । ‘शारीरिक रुपमा म ठिक छु । मेरो लागि व्यक्तिगत र शारीरिक रुपमा कुनै समस्या छैन,’ उनले भने, ‘ शनिबार मैले केहि हल्का प्रशिक्षण गरेको थिएँ । यसमा डराउनुपर्ने केहि छैन । सामान्य चोट रहेकाले जोखिम नलिएको हो ।’

अहिले खेलिरहेका मध्य विश्वकपमा सर्वाधिक खेल खेल्ने खेलाडी मेस्सी आफ्नो पाँचौ विश्वकप खेल्दैछन् । उनले विगतको तुलनमा यसपटक खासै केहि फरक नगरेको बताए । ‘मैले विशेष केहि गरेको छैन । मैले सदाजस्तै आफ्नो ध्यान राखेको छु । यो विशेष क्षण हो, र सम्भवत मेरो अन्तिम विश्वकप पनि । अहिलेको टोली निकै राम्रो छ र हामीले जित्ने अपेक्षा गरेका छौं ।’

मेस्सीले आफ्नो करिअरमा विश्वकप बाहेक सम्भव सबै उपाधि जितेका छन् । विश्व फुटबलकै महान खेलाडीमा गनिने मेस्सी अर्जेन्टिनाबाहिर पनि आफ्नो समर्थक रहेकोमा खुसी मान्छन् । ‘ अर्जेन्टिनाबाहिर पनि हामीले उपाधि जितोस भन्ने हुँदा राम्रो लाग्छ । हुनसक्छ त्यो मेरी कारणले पनि हो । म आफ्नो करिअरभर प्राप्त प्रेमका लागि धन्यवाद भन्न चाहन्छु । कतारमा पनि अर्को उदाहरण देख्नुहुनेछ,’ उनले भने ।

‘हामी यसपटक विश्वकपमा विगतभन्दा फरक रुपमा आएका छौं । गत वर्ष कोपा अमेरिका जितेपछि हामीलाई दबाब कम छ । यसपटक राष्ट्रिय टोलीले नतिजा दिन नसकेको दबाब नभएर एक आपसमा राम्रो भावना छ,’ उनले भने ।

अर्जेन्टिना र साउदी सम्मिलित समूह सी मा मेक्सिको र पोल्यान्ड पनि रहेका छन् ।