कतार (हाम्रो खेलकुद) – म्यानचेस्टर सिटीका मिडफिल्डर ज्याक ग्रिलिसले फिफा विश्वकप कतार २०२२ अन्तर्गत इरानविरुद्ध समूह चरणको खेलमा गोल गरे । इंग्ल्यान्डले ६-२ को सानदार जित दर्ता गर्दा ग्रिलिसले अन्तिम गोल गरेका थिए ।

गत सिजन एस्टन भिल्लाबाट क्लब कीर्तिमान रकममा सिटी पुगेका उनले अपेक्षा गरेअनुसार गोल गर्न सकेका छैनन् । तर प्रशिक्षक पेप गुआर्डीअ‍ोलाले उनलाई गोलका लागि अनुबन्ध नगरेको भन्दै बचाउ गर्दै आइरहेका छन् । बलमाथि नियन्त्रण र आक्रमणमा डिफेन्स बिट गर्न सक्ने क्षमताका लागि प्रख्यात ग्रिलिसले कतार विश्वकपमा ७ नम्बर जर्सी पाएका छन् । यसले पनि प्रशिक्षक साउथगेटले उनलाई महत्त्वका साथ हेरेको बुझ्न सकिन्छ । इरानविरुद्ध ग्रिलिस सुरुवाती रोजाइमा थिएनन् । खेलको ७० अ‍ौं मिनेटमा मैदान प्रवेश गरेका उनलाई खेलमा जम्न कुनै समय लागेन ।

फोडेन र रासफर्ड विंगमा खेल्दा साउथगेटले ग्रिलिसलाई नम्बर १० रोल दिएका थिए । केहीबेर केनसँग खेलेपछि उनले क्यालम विल्सनसँग राम्रो समन्वय गरे । दोस्रो हाफमा इन्ज्युरी समय १० मिनेट थप्नुले पनि ग्रिलिसले धेरै समा पाए । उनले गोल गर्दा पनि विल्सनको पास लिएपछि संयमित फिनिस गरे ।

गोलपछि ग्रिलिसले गरेको सेलेब्रेसन भने विशेष थियो । उनले म्यानचेस्टर सिटीका फिनले नामक‌ समर्थकलाई गोल समर्पण गरेका थिए ‌‌। सिटीका समर्थक फिनले र ग्रिलिसबीच भेट हुँदाको क्षणमा फिनलेले ग्रिलिसलाई गोल गरेपछि उक्त सेलेब्रेसन गर्न आग्रह गरेका थिए ।

फिनले र ग्रिलिसको भेट पत्रमार्फत सम्भव भएको थियो । फिनलेले ग्रिलिसलाई फ्यान मेल नामक प्रिमियर लिगको कार्यक्रममा पत्र लेखेका थिए । फिनले सेरेब्रल पाल्सी नामक रोगबाट जुधिरहेका र ग्रिलिसको बहिनी पनि सोहि रोग लागेका कारण ग्रिलिस पत्र पढ्दा केही भावुक बनेका थिए ।

फिनलेले गोे गरेपछि सेलेब्रेसन गर्न आग्रह गरेपछि ग्रिलिसले आफू धेरै गोल गर्ने खेलाडी नभएको बताएका थिए । तर उनले अबको अर्को गोलमा उक्त सेलेब्रेसन गर्ने भनेका थिए । संयोगवश उक्त गोल विश्वकपमा भयो ।

ग्रिलिसले खेलपछि फिनलेलाई समर्पण भन्दै ट्वीट पनि गरेका छन् ।

For you Finlay ❤️ pic.twitter.com/BomJEA0oy6

— Jack Grealish (@JackGrealish) November 21, 2022