कतार (हाम्रो खेलकुद) – फिफा विश्वकपमा पुनरागमन गरिरहेका संयुक्त राज्य अमेरिका र वेल्स सोमबार समूह बी को दोस्रो खेलमा आमनेसामने हुँदैछन् । खेल अहमद बिन अलि रंगशालामा नेपाली समयअनुसार मध्यरात १२:४५ बजे सुरु हुनेछ ।

सन् २०१८ मा रुसमा भएको विश्वकपका लागि छनोट हुन नसकेको अमेरिका ११ औं पटक विश्वकप खेल्दैछ । कन्काकाफ क्षेत्रको च्याम्पियन अमेरिकाले विश्वकपको पछिल्लो १० खेलमा १ गोल भन्दा बढी अन्तरको नतिजा हासिल गरेको छैन ।

यता वेल्स ६४ वर्षपछि विश्वकपमा फर्किएको टोली हो । युरोपेली प्लेअफमा अष्ट्रिया र युक्रेनलाई हराउँदै छनोट भएको टोलीको यो दोस्रो विश्वकप सहभागिता हो । पछिल्लो पटक सन् १९५८ मा क्वाटरफाइनलसम्म पुगेको वेल्स यसपटक कम्तिमा त्यो उपलब्धि बराबर गर्न चाहन्छ ।

अमेरिका र वेल्सले हालसम्म दुई पटक अन्तर्राष्ट्रिय खेल खेलेका छन् । अमेरिकाले एक खेलमा जित हासिल गर्दा अर्को खेल बराबरीमा सकिएको छ । सन् २०२० मा भएको मैत्रीपूर्ण खेल गोलरहित बराबरीमा सकिएको थियो ।

अमेरिकाले पछिल्लो चार सहभागितामा एकपटक मात्र पहिलो खेल हारेको छ । पछिल्लो १० विश्वकप खेलमा एकपटक मात्र गोल गर्न चुकेको अमेरिका गोल गर्ने लयलाई कायम राख्न चाहन्छ । वेल्सले पछिल्लो पटक खेलेको विश्वकप खेलमा ब्राजिलियन पेले नायक बनेका थिए । १७ वर्षीय पेलेको एकमात्र गोलमा वेल्स बाहिरिएको थियो ।

वेल्सले सहभागिता जनाएको पछिल्लो तीन अन्तर्राष्ट्रिय प्रतियोगितामा समूह चरण पार गरेको इतिहास छ । सन् १९५८ को विश्वकपपछि सन् २०१६ र २०२० को युरोमा टोलीले समूह चरण पार गरेको थियो ।

हालसम्म वेल्सले विश्वकपमा ५ खेल खेल्दा १ जित, ३ बराबरी र १ हारको नतिजा निकालेको छ । यता अमेरिकाले ३३ खेल खेल्दा ८ जित, ६ बराबरी र १९ हार बेहोरेको छ ।