कतार (हाम्रो खेलकुद) – फिफा विश्वकप कतार २०२२ अन्तर्गत उद्घाटन खेलमा आयोजक कतार र इक्वेडर भिड्दैछन् । खेल नेपाली समयअनुसार रातको ९:४५ बजे सुरु हुनेछ ।

खेलको पूर्वसन्ध्यामा कतारका प्रशिक्षक फेलिक्स सान्चेजले नतिजा भन्दापनि खेलको महत्त्व बढी रहेको बताए । ‘मेरो लागि यो लामो यात्राको अन्त्य हो । १६ वर्ष यो देशमा काम गरेपछि यो विशेष अवसर जुरेको छ । हामी नतिजा जे भएपनि यो दिनलाई विशेष महत्त्वको साथ हेर्नेछौं,’ उनले भने ।

‘यदि तपाईंले १६ वर्षअघि मलाई आजको दिन आउँछ भन्नुभएको भए विश्वास गर्ने थिइनँ । तर आज हामी यो स्थानमा छौं । म यो अवसरमा रमाउनेछु,’ उनले थपे ।

इक्वेडरले विश्वकपमा चौथो पटक सहभागिता जनाउँदै छ । तर टोलीले एसियाली राष्ट्रसँग भने पहिलो पटक खेल्दै हुनेछ । प्रशिक्षक सान्चेज इक्वेडर शारीरिक रुपमा निकै बलियो टोली रहेको बताए ।

‘विश्वकप छनोटमा इक्वेडरले धेरैलाई आश्चर्यमा पारेको थियो । होम होस् या अवे, सबै खेलमा राम्रो प्रदर्शन गरेको थियो । विपक्षीको रुपमा हेर्दा निकै सन्तुलित टोलीको रुपमा हेरेको छु । इक्वेडर अवसर सिर्जना गर्न सक्छ र डिफेन्समा निकै कम्प्याक्ट खेल्छ । शारीरिक रुपमा पनि निकै बलियो देखेको छु,’ उनले टुंग्याए ।

कतारका कप्तान हासान अल हेडोसले आफ्नो बाल्यकालदेखिको सपना पूरा हुन लागेको बताए । ‘म विश्वकपमा सहभागी हुन पाउँदा निकै गौरवान्वित महसुस गरिरहेको छु । हामीले विगतमा पनि छनोट हुने प्रयास गरेका थियौं, तर सकेनौं । अहिले आयोजकको रुपमा यहाँ छौं,’ उनले भने ।

‘विश्वकप छनोटकै प्रदर्शनका आधारमा पनि हामी छनोट हुने थियौं । यो स्तरमा खेल्न पाउँदाको खुसी व्यक्त गर्न सक्दिन । विश्वकप खेल्ने ठूला नामसँगै आफ्नो नाम हुँदा खुसी र गर्व महसुस भएको छ,’ उनले थपे ।

कप्तान हेडोसले यो विश्वकप कतार मात्र नभएर सम्पूर्ण अरब क्षेत्रको रहेको बताए । ‘यो पूरा अरबको विश्वकप हो । हामीले सम्पूर्ण अरब राष्ट्रको जिम्मेवारी बोकेको अनुभव गरेको छु । टिमको रुपमा र खेल भावनाले अरबको प्रतिनिधित्व गर्नेछौं,’ उनले टुंग्याए ।