एजेन्सी – सुरुवाती अग्रता जोगाउन नसक्दा जापानले फिफा विश्वकप कतार २०२२ को तयारी स्वरुप खेलिएको अन्तर्राष्ट्रिय मैत्रीपूर्ण खेलमा हार बेहोरेको छ ।

जापान क्यानडासँग २–१ ले पराजित भएको हो । अल म्याकटुम रंगशाला दुवईमा बिहीबार भएको खेलमा क्यानडाको जितमा स्टेभन भिटोरिया र लुकास ड्यानियल काभालिनीले गोल गरे । जापानका युकी सोमाको गोल सान्त्वना बन्यो ।

खेलको नवौं मिनेटमा युकी सोमाको गोलबाट जापानले सुरुवाती अग्रता लिएको थियो । जापानको त्यो अग्रता लामो समय टिकेन । २१औं मिनेटमा स्टेभन भिटोरियाले गोल गर्दै खेललाई १–१ गोलको बराबरीमा ल्याए ।

बराबरीतर्फ धकेलिएको खेलको इन्ज्युरी समयको थप गरिएको पाँचौं मिनेटमा लुकास ड्यानियलले पेनाल्टीमा गोल गर्दै जापानलाई २–१ को हार चखाए । पेनाल्टी बक्समा रिची लारयलाई मिकी यमानेले फउल गरेपछि रेफ्रीले क्यानडालाई पेनाल्टी प्रदान गर्दा लुकास चुकेनन् ।

अब दुवै टोली विश्वकपमा होमिनेछ । समूह ‘ई’ मा रहेको जापानले मंसिर ७ गते बुधबार जर्मनी, ११ गते आइतबार कोस्टा रिका र १५ गते बिहीबार स्पेनसँग खेल्नेछ ।

यता, समूह ‘एफ’ मा रहेको क्यानडाले मंसिर ७ गते बुधबार बेल्जियम ११ गते आइतबार क्रोएसिया र १५ गते बिहीबार मोरोक्कोसँग खेल्नेछ ।