काठमाडौं (हाम्रो खेलकुद) – पाकिस्तानलाई मैत्रीपूर्ण फुटबल खेलमा पराजित गरेपछि नेपाली राष्ट्रिय फुटबल टोलीका मुख्य प्रशिक्षक प्रवेश कटुवालले आफ्नो करिअरकै सबैभन्दा ठूलो उपलब्धि पाएको बताएका छन् ।

पोष्ट म्याच कन्फ्रेन्समा प्रशिक्षक कटुवालले नेपालले छोटो समयमा अभ्यास गरेपनि राम्रो खेल्दै जित निकालेको बताए । बुधबार दशरथ रंगशालामा भएको खेलमा नेपालले पाकिस्तानलाई १–० गोलले पराजित गरेको हो । अन्जन विष्टले गोल गरेका थिए ।

प्रशिक्षक कटुवालले भने, ‘म खुशी छु । १४ वर्षपछि नेपालले पाकिस्तानलाई हराएको छ । त्यसकारण म खुशी छु । हामीले १२ दिनको मात्रै अभ्यास गर्न पाएका थियौँ । छोटो समयको अभ्यास भएपनि राम्रो खेल्दै जित्यौँ । यो मेरो करिअरकै ठूलो सफलता मान्छु । जितको श्रेय खेलाडीलाई दिन्छु । ’ राष्ट्रिय टोलीको प्रशिक्षणको जिम्मेवारी पाउनु आफ्ना लागि पुरस्कार भएको पनि कटुवालले बताए ।

पाकिस्तानविरुद्ध गोल गर्दै जित दिलाउँदै म्यान अफ दी म्याच बनेका अन्जनले विष्टले भने, ‘यो अन्त्य होइन । अझै धैरै गर्न बाँकी नै छ । यो गोल सबै समर्थकलाई समर्णपन गर्न चाहन्छु । जित्नको लागि खेल्छु । तर उच्च स्कोर बनाउछु भनेर खेल्दिन । यदी त्यसरी खेले म अड्किन्छु होला ।’ राष्ट्रिय टोलीबाट अन्जनको गोलसंख्या ११ पुगेको छ ।

पाकिस्तानका मुख्य प्रशिक्षक शाहजाद अनवारले नेपालले राम्रो खेलेको भन्दै आफ्नो टिमको प्रदर्शनमा पनि सन्तुष्ट रहेको बताए । उनले भने, ‘नेपालले राम्रो खेल्यो, बधाई दिन चाहन्छु । म मेरो खेलाडीको प्रदर्शनमा सन्तुष्ट छु । हाम्रो लागि जित भन्दा पनि लामो समयपछि अन्तर्राष्ट्रिय फुटबल खेल खेल्नु ठूलो थियो ।’