एजेन्सी – फिफा विश्वकप कतार २०२२ मा अर्जेन्टिनाका कप्तान लिओनेल मेस्सी सर्वाधिक अनुभवी खेलाडीका रुपमा रहेका छन् । सन् २००६ यता नियमित विश्वकप खेलिरहेका मेस्सी पाँचौ विश्वकप खेल्ने तयारीमा छन् ।

मेस्सीले हालसम्म विश्वकपमा १९ खेल खेलेका छन् । सन् २०१४ मा फाइनलमा पराजित अर्जेन्टिना गत संस्करण भने फ्रान्ससँग राउन्ड अफ १६ मा पराजित भएको थियो । त्यसअघि सन् २००६ र २०१० मा भने अर्जेन्टिनाको यात्रा क्वाटरफाइनलमा पराजित भएको थियो ।

यसपटक समूह सी मा रहेको अर्जेन्टिनालाई उपाधिको दावेदारको रुपमा हेरिएको छ । अर्जेन्टिनाको समूहमा मेक्सिको, साउदी अरेबिया र पोल्यान्ड रहेका छन् । मेस्सीले यसपटक विश्वकपको फाइनल खेले उनी विश्वकप इतिहासमै सबैभन्दा धेरै खेल खेल्ने खेलाडी बन्नेछन् ।

विश्वकपको इतिहासमा जर्मनीका लोथार मथाउसले सर्वाधिक २५ खेल खेलेका छन् । सन् १९८२ देखि सन् १९९८ सम्म उनले लगातार ५ संस्करणमा सहभागिता जनाए । त्यसपछि जर्मनीकै मिरोस्लाभ क्लोज २४ खेल र इटालीका पाओलो माल्डिनी २३ खेलसहित सर्वाधिक खेल्ने खेलाडीमा छन् ।

यसपटक विश्वकपमा सहभागी खेलाडीमा भने मेस्सीपछि पोर्चुगलका क्रिस्टियानो रोनाल्डोले १७ खेल खेलेका छन् । जर्मनीका थोमस मुलर र म्यानुएल नोएर तथा उरुग्वेका फर्नान्डो मुस्लेराले पनि १६ खेल खेलेका छन् । फ्रान्सका ह्युगो लोरिसले १५ खेल खेलेका छन् ।