एजेन्सी – यो सिजन उच्च लयमा रहेको नेपोलीले इटालियन सिरी ‘ए’ मा अपराजित यात्रा कायमै राखेको छ । सिरी ‘ए’ मा १२औं जित निकाल्ने क्रममा नेपोलीले इम्पोलीलाई २–० ले पराजित गरेको छ ।

स्टेडियो डिएगो अर्मान्डो म्याराडोनामा मंगलबार राति भएको खेलमा नेपोलीको जितमा हिर्भिङ लोजानो र पिएटर जिलेन्स्कीले गोल गरे । पहिलो हाफमा पाहुना टोलीले घरेलु टोलीलाई गोलरहित बराबरीमा रोकेपनि दोस्रो हाफमा रोक्न सकेन ।

६९औं मिनेटमा मेक्सिकन फरवार्ड हिर्भिङ लोजानोले पेनाल्टीमा गोल गर्दै नेपोलीलाई १–० को अग्रता दिलाए । ७४औं मिनेटमा सेबास्टिएनो लुपेर्टो रातो कार्ड खाँदै मैदानबाट बाहिरिएपछि इम्पोली १० खेलाडीमा समेटिन पुग्यो । ८८औं मिनेटमा पिओटर जिलेन्स्कीले गोल गर्दै नेपोलीको जित सुनिश्चित गरे ।

सिरी ‘ए’ मा १४ खेलमा अपराजित नेपोली ३८ अंकसहित तालिकाको शीर्ष स्थानमा छ । दोस्रो स्थानको मिलानको ३० अंक छ । पराजित इम्पोली१४ अंक जोडेर १४औं स्थानमा सीमित छ ।

यता, क्रेमोनेसीसँग गोलरहित बराबरीमा रोकिएसँगै साविक विजेता एसी मिलानले इटालियन सिरी ‘ए’ मा शीर्षस्थानमा रहेको नेपोलीसँग अग्रता छोट्याउने मौका गुमाएको छ ।

मंगलबार राति क्रेमोनेसीको मैदान जियोभानी जिनीमा भएको खेलमा मिलानले आक्रमण अवसर बुने पनि फिनिसिङमा चुक्दा बराबरीमा चित्त बुझाउनु प¥यो । बराबरीसँगै मिलान १४ खेलबाट ३० अंकसहित लिग तालिकाको दोस्रो स्थानमा छ । क्रमोनेसी ७ अंकसहित १८औं स्थानमा छ ।

अर्काे खेलमास्पेजिया र उडिनेसले १–१ को बराबरी खेल्दै अंक बाँडेका छन् । बराबरीसँगै १४ खेलबाट २४ अंक जोडेको उडिनेस तालिकाको आठौं स्थानमा छ । १० अंक जोडेको स्पेजिया १६औं स्थानमा छ ।