एजेन्सी – परिवर्तित खेलाडीको रुपमा मैदान छिरेका वेल्सका कप्तान ग्यारेथ बेल नायक बन्दा लस एन्जलस (एलए) एफसीले अमेरिकी मेजर लिग सकर (एमएलएस) कपको उपाधि जितेको छ ।

फिलाडेल्फिया युनियनलाई प्ले अफको टाइब्रेकरमा ३–० ले पराजित गर्दै १० खेलाढीमा समेटिएको लस एन्जलसले उपाधि जितेको हो । लस एन्जलसको यो पहिलो उपाधि हो ।

निर्धारित समयमा २–२ को तथा त्यसपछि अतिरिक्त समय ३–३ गोलको बराबरी भएपछि खेल टाइब्रेकरमा पुगेको थियो । टाइब्रेकरमा लस एन्जलसका सान्चेज, रायन र डेनिसले गोल गरे । क्रिस्टियनले गोल गर्न सकेनन् । युनियनका काइ वाग्नेर, जोसे मार्टिनेज र डानिल चुके ।

त्यसअघि लस एन्जलसमा आइतबार बिहान भएको खेलको नियमित र थप गरिएको अतिरिक्त समयमा घरेलु टोलीका केलयन एकोस्टा, जेसस मुरिल्लो र ग्यारेथ बेलले गोल गर्दा युनियनका ज्याक इलिओटले दुई तथा डानियल गजदागले एक गोल गरे ।

खेलको २८औं मिनेटमा केलयनको गोलबाट लस एन्जलसले अग्रता लिएको थियो । ५९औं मिनेटमा डानियल गजदागले बराबरी गोल फर्काए । ८३औं मिनेटमा जेसस मुरिल्लोले गोल गर्दै लस एन्जलसलाई २–१ को अग्रता दिलाए । ८५औं मिनेटमा ज्याक इलिओटले गोल गर्दै खेललाई अतिरिक्त समयमा लम्ब्याए ।

११६औं मिनेटमा म्याक्सिमी क्रेपेउ सिधै रातो कार्ड खाँदै मैदानबाट बाहिरिदा लस एन्जलस समस्यामा प¥यो । अतिरिक्त समयको थप गरिएको चौथो मिनेटमा ज्याक इलिओटले गोल गर्दै युनियनलाई ३–२ ले अघि बढाए । त्यसपछि आठौं मिेटमा परिवर्तित खेलाडी बेलले गोल गर्दै खेललाई टाइब्रेकरमा लम्ब्याए । बेल ९७औं मिनेटमा कार्लाेस भेलाको स्थानमा मैदान छिरेका थिए ।