काठमाडौं (हाम्रो खेलकुद)– नेपाल र पाकिस्तानको राष्ट्रिय फुटबल टोलीबीच प्रस्तावित दुई मैत्रीपूर्ण खेल मध्ये एक मात्र खेल्न सकिने निष्कर्षमा अखिल नेपाल फुटबल संघ (एन्फा) पुगेको छ । पाकिस्तान फुटबल महासंघ (पिएफएफ) ले एन्फासँग कात्तिक २७ र मंसिर २ गते मैत्रीपूर्र्ण खेलका लागि प्रस्ताव गरेको छ ।

पिएफएफको प्रस्तावमा छलफल गर्दै एन्फाले सोमबार एउटा मात्र मैत्रीपूर्ण खेल कात्तिक ३० गते खेल्न सक्ने गरि पत्र पठाउने निर्णय गरेको छ । मंसिर ४ गते संघ र प्रदेशको निर्वाचन भएकाले २ मैत्रीपूर्ण खेल खेल्न नसकिने निष्कर्षमा पुगेको एन्फा श्रोतले बताएको छ । पाकिस्तानको जवाफपछि मात्र मैत्रीपूर्ण खेल हुने नहुने निर्णय हुने बताइएको छ ।

वरिष्ठ उपाध्यक्ष वीरबहादुर खड्काको अध्यक्षतामा राजधानीमा उपलब्ध पदाधिकारी, सदस्य तथा प्रशिक्षक र खेलाडी संघका प्रतिनिधिसम्मिलित बैठकले २ मैत्रीपूर्ण खेल्न नसकिने निष्कर्ष निकालेको हो । नेपालसँगको मैत्रीपूर्ण खेलका लागि पाकिस्तानले लामो तयारी गरेको बताइएको छ । तर, नेपाली टोली भने हाल प्रशिक्षक विहिन छ ।

असोज ११ गते बंगलादेशविरुद्ध मैत्रीपूर्ण खेल खेलेको नेपाली टोलीले त्यसयता अभ्यास गरेको छैन । बंगलादेशविरुद्धको मैत्रीपूर्ण खेलका लागि एन्फाले प्रदीप हुमागाईलाई कार्यवहाक मुख्य प्रशिक्षक नियुक्त गरेको थियो ।