एजेन्सी – स्पेनिस युवा स्टार अन्सु फातीले क्याटलान क्लब बार्सिलोना छाड्ने संकेत गरेका छन् । पर्याप्त खेल्ने समय नपाएको भन्दै फाती बार्सिलोना छाड्न तयार देखिएका हुन् ।

एजेन्ट जर्ज मेन्डेसले फातीलाई बार्सिलोनामा पर्याप्त समय खेल्न दिनुपर्ने बताउँदै त्यसो हुन नसके फातीले क्लब छाड्ने चेतावनी दिएका छन् । फातीले खेल्ने समयलाई लिएर उनी आफैं र एजेन्ट मेन्डेस क्लबसँग सन्तुष्ट नरहेको बुझिएको छ । तर, यस विषयमा बार्सिलोनाले केही बोलेको छैन ।

१९ वर्षीय फातीको रिलिज क्लज ८६८ मिलियन पाउन्ड रहेकाले उनी बस्नेमा क्लब ढुक्क छ । बार्सिलोनाले यस सिजन खेलेका ११ लिग खेलमा फातीले मात्र दुई खेलमा सुरुवाती रोजाईमा मौका पाएका छन् । यस सिजन फातीले १६ खेलमा मैदान उत्रदा तीन गोल गरेका छन् भने तीन गोलको अवसर सिर्जना गरेका छन् ।

फातीले अघिल्लो सिजनको भन्दा बढी गोल गरिसकेका छन् । सन् २०२० मा स्पेनबाट डेब्यु गरेका उनले चार क्याप समेत जितेका छन् । उनी युरोपेली क्लब फुटबलमा युवा स्टारको रुपमा देखिएको थियो । तर, चोटका कारण उनले अपेक्षाकृत प्रदर्शन गर्न सकेका छैनन् ।

बार्सिलोना यस सिजन पनि च्याम्पियन्स लिगको समूह चरणबाट बाहिरिसकेको छ । बार्सिलोना लगातार दोस्रो सिजन च्याम्पियन्स लिगको समूह चरणबाट बाहिरिएको छ । टोली स्पेनिस ला लिगामा रियल म्याड्रिडसँग ३ अंकले पछि रहँदै दोस्रो स्थानमा रहेको छ ।