एजेन्सी – फ्रान्सेली विंगर औसमाने डेम्वेलेले एक गोलसँगै तीन असिस्ट प्रदान गरेपछि क्याटलान क्लब बार्सिलोनाले स्पेनिस ला लिगामा सानदार जित निकालेको छ ।

बार्सिलोनाले घरेलु मैदानमा एथलेटिको बिल्वाओमाथि ४–० को सानदार जित निकाल्दै शीर्षस्थानमा रहेको रियल म्याड्रिडसँगको अंक दुरी छोट्याएको हो ।

आइतबार राति भएको खेलमा घरेलु टोलीको फराकिलो जितमा औसमाने डेम्वेले, सर्जी रोबर्टाे, रोबर्ट लेवान्डोस्की र फेरान टोरेसले गोल गरे । बार्सिलोनाले पहिलो हाफमा तीन तथा दोस्रो हाफमा एक गोल थपेको थियो ।

क्याम्प नोउमा बार्सिलोनाले खेलको १२औं मिनेटमा डेम्वेलेको गोलबाट अग्रता लिएको थियो । उनले लेवान्डोस्कीको पासमा गोल गर्न सफल भएका थिए । १८औं मिनेटमा सजी रोबर्टाेले डेम्वेलेको पासमा गोल गर्दै बार्सिलोनाको अग्रता दोब्बर पारे ।

२२औं मिनेटमा लेवान्डोस्कीले गोल गर्दै बार्सिलोनालाई ३–० ले अघि बढाए । उनले डेम्वेलेको पासमा गोल गर्न सफल भएका थिए ।

त्यसपछि ७३औं मिनेटमा परिवर्तित खेलाडी फेरान टोरेसले गोल गर्दै बार्सिलोनाको जित पक्का गरे । ६३औं मिनेटमा पेड्रीको स्थानमा मैदान छिरेका टोरेसले त्यसको १० मिनेटपछि डेम्वेलेको पासमा गोल गर्न सफल भएका थिए ।

बार्सिलोनाले रियलसँगको अंक दुरी ३ मा छोट्याएर रियलमाथि दवाव बढाएको छ । यस नतिजासँगै दोस्रो स्थानमा रहेको बार्सिलोनाको ११ खेलबाट २८ अंक पुगेको छ । समान खेलबाटै शीर्षमा रहेको रियलको ३१ अंक छ । पराजित विल्वाओ १८ अंक जोडेर छ्रैटौं स्थानमा छ ।