युभेन्ट्सको सानदार जित

एजेन्सी – इटालियन सिरी ‘ए’ मा युभेन्ट्सले सानदार जित निकालेको छ । युभेन्ट्सले घरेलु मैदानमा इम्पोलीमाथि ४–० को सानदार जित हात पारेको हो ।

युभेन्ट्सको फराकिलो जितमा एड्रिएन राविओटले दुई तथा मोइस किन र वेस्टन म्याकिनीले समान एक गोल गरे । पहिलो हाफमा एक तथा दोस्रो हाफमा तीन गोल सम्भव भएको थियो ।

एलिएन्ज स्टेडियम टोरिनोमा शुक्रबार राति भएको खेलको आठौं मिनेटमा मोइस किनको गोलबाट युभेन्ट्सले १–० को अग्रता लिएको थियो । उनले फिलिप कोस्टिकको पासलाई सदुपयोग गरेका थिए ।

५६औं मिनेटमा वेस्टन म्याकिनीले गोल गर्दै युभेन्ट्सको अग्रता दोब्बर पारे । उनले जुआन कोर्डाडोको पासलाई सदुपयोग गरेका थिए ।

त्यसपछिको दुवै गोल एड्रिएन राविओटको नाममा रह्यो । ८२औं मिनेटमा राविओटले कोर्डाडोकै पासमा गोल गर्दै युभेन्ट्सलाई सहज जिततर्फ अघि बढाए । त्यसपछि इन्ज्युरी समयको थप गरिएको चौथो मिनेटमा राविओटले डानिलोको पासमा व्यक्तिगत दोस्रो र टोलीका लागि चौथो गोल गर्दै युभेन्ट्सलाई ४–० को फराकिलो जित दिलाए ।

यस जितसँगै युभेन्ट्स ११ खेलबाट १९ अंक जोडेर सातौं स्थानमा उक्लिएको छ । पराजित इम्पोली ११ अंक जोडेर ११औं स्थानमा रहेको छ ।