दिपेन्द्र पोखरेल

दुहबी – एपिएफले सातौं राष्ट्रिय खेलकुदअन्तर्गत महिला फुटबलमा स्वर्ण पदक जितेको छ । सुनसरीको दुहबी रंगशालामा अर्को विभागिय टोली नेपाल पुलिस क्लबलाई टाइब्रेकरमा ४–२ ले हराउँदै एपिएफ राष्ट्रिय च्याम्पियन बनेको हो । निर्धारित समय गोलरहित बराबरीमा सकिएपछि पेनाल्टी सुटआउटमा एपिएफ भाग्यशाली रह्यो ।

खेलभर पुलिसले नियन्त्रण जमाएपनि गोलको खाता खोल्न सकेन । पहिलो भएको एपिएफका खेलाडीले जनही ७ हजार रुपैयाँ प्राप्त गरेका छन् । प्रतियोगितामा पुलिसकी निरु थापा ५ गोलसहित प्रतियोगिताको सर्वाधिक गोल कर्ता बनिन् । त्यसअघि मध्यमाञ्चललाई २–१ ले हराउँदै त्रिभुवन आर्मी क्लब तेस्रो बनेको थियो ।
दुवै टोली अपराजित रहँदै अन्तिम दुईमा पुगेका थिए । समूह चरणमा यी दुई टोली एकै समूहमा थिए । समूह चरणमा यी दुईबीचको खेल १–१ को बराबरी खेलेका थिए । दुवैले समूह चरणमा ३ खेलमा समान ७ अंक जोडेका थिए । गोलअन्तरमा मात्र दुई टोलीबीच फरक थियो । समूह चरणमा विजेता बन्ने क्रममा पुलिसले ३ खेलमा ८ गोल गर्दै १ गोल खाएको थियो । एपिएफले ८ गोल गर्दै २ गोल खाएको थियो ।

शुक्रबार भएको सेमिफाइनलमा पुलिसले मध्यमाञ्चललाई ५–० ले र एपिएफले अर्को विभागिय टोली त्रिभुवन आर्मी क्लबलाई ३–० ले हराएर एकअर्कोसँगको भेट पक्का गरेका थिए । पाँच विकास क्षेत्र र तीन विभागिय टोलीको सहभागितामा महिला फुटबल पुस २ गतेबाट सुरु भएको थियो ।