स्याङ्जा (हाम्रो खेलकुद) – नवौँ राष्ट्रिय खेलकुदअन्तर्गत महिला फुटबल प्रतियोगिताको सेमिफाइल समिकरण पूरा भएको छ ।

सोमबार एपीएफले गण्डकी प्रदेशलाई तथा प्रदेश १ ले कर्णाली प्रदेशलाई पराजित गरेसँगै सेमिफाइनल पुग्ने चार टोलीको टुंगो लागेको हो ।

सोमबार स्याङ्जाको वालिङमा भएको महिला फुटबलमा एपीएफले गण्डकी प्रदेशलाई ५–० को गोलले पराजित गर्न सफल भयो । खेलको दोस्रो मिनेटमा एपिएफकी रञ्जना दर्जीले पेनाल्टीबाट गोल गर्दै १–० गोलको अग्रता दिलाइन् ।

छैटौं मिनेटमा अनिता केसीले गोल गर्दै २–० को अग्रता दिलाइन् । खेलको ३७ औँ मिनेटमा सरु लिम्बुले तेस्रोे गोल गरेपछि एपीएफले पहिलो हाफसम्म ३–० गोलको अग्रता बनाएको थियो । ८३औँ मिनेटमा रञ्जना र ८८औँ मिनेटमा अनिताले गोल गरेपछि एपीएफले गण्डकीलाई ५–० गोलले पराजित गरेको हो ।

त्यस्तै सोमबार नै भएको समूह चरणको अन्तिम खेलमा प्रदेश १ ले कर्णाली प्रदेशलाई ६–० गोल अन्तरले पराजित गरेको छ । प्रदेश १ को जितका लागि अञ्जना राईले दुई गोल गरिन् । त्यस्तै, अनिता गुरुङ, प्रतिक्षा राई, तिर्था कुमारी लिम्बु र ममता राउतले समान १–१ गोल गर्न सफल भए ।

मंगलबार सेमिफाइनलका खेल हुनेछन् । पहिलो सेमिफाइनलमा नेपाल पुलिस क्लबले प्रदेश १ सँग प्रतिस्पर्धा गर्नेछ । अर्को सेमिफाइनलमा त्रिभुवन आर्मी फुटबल क्लबले एपीएफ क्लबसँग फाइनल प्रवेशको लागि प्रतिस्पर्धा गर्नेछ ।