पोखरा (हाम्रो खेलकुद)– प्रदेश १ ले प्रोटेष्ट (उजुरी) गरेका एनआरएनएका ८ खेलाडी नवौं राष्ट्रिय खेलकुदअन्तर्गत फुटबल खेल्न नपाउने भएका छन् । आयोजक राष्ट्रिय खेलकुद परिषद् (राखेप) को प्राविधिक समितिले प्रदेश १ विरुद्ध खेलेका एनआरएनएका ८ राष्ट्रिय फुटबल खेलाडीलाई खेलाउन नपाउने बताएको छ ।

गोस्टेघाटमा बिहीबार भएको उद्घाटन खेलमा एनआरएनएले प्रदेश १ लाई २–० ले हराएको थियो । गोल गर्ने संजोक राई र विमल घर्ती मगरसहित अनन्त तामाङ, पुजन उपरकोटी, सुजल श्रेष्ठ, विशाल राई, इशान खड्का र अशोक खवासविरुद्ध प्रदेश १ ले प्रोटेष्ट राखेको थियो । ८ खलाडीसम्मलित खेल जितेको एनआरएनले जितेको खेलको नतिजा प्रदेश १ को पक्षमा गएको छ।

‘उजुरी परेका ८ खेलाडीले बाँकी खेल खेल्न पाउने छैनन् । अब एनआरएनलेले टोलीमा रहेका १२ खेलाडीबाट सहभागिता जनाउँन पाउनेछ,’ प्राविधिक समितिका सचिव प्रचण्ड शर्माले भने, ‘उजुरी परेअनुसार ८ जनाले एनआरएनए भएको प्रमाणित गर्न सक्नुभएन । खेलको नतिजा पनि प्रदेश १ ले जितेको निर्णय गरिएको छ।’

प्रदेश १ ले आफूविरुद्ध गैर आवासिय नेपाली संघ (एनआरएनए) ले नियम विपरित नेपालमै रहेका खेलाडीलाई खेलाउन लागेकोमा विरोध जनाएको थियो । खेलपछि प्रोटेस्ट हाल्न पाउने गरि खेल्न आयोजकले आग्रह गरेपछि प्रदेश १ खेल्न राजी भएको थियो । प्राविधिक समितिले उजुरी परेको दुई दिनमा उजुरी उपर कारवाही गरेको छ ।

८ मध्ये अधिकाशं प्रदेश १ कै खेलाडी हुन् । खेलाडीले प्रदेशले आफूहरुलाई वास्ता नगरेको र प्रदेशले भने खेलाडी छनोटमा सहभागी नभएको दाबी गर्दै आएका छन् ।

यो पनि : फुटबलरका पीडा – प्रदेशले टोलीमा राखेन, एनआरएनएबाट खेल्न नियमले मिल्दैन