काठमाडौं (हाम्रो खेलकुद) – दक्षिण एसियाको महिला फुटबलमा नेपाल फाइनलको स्वभाविक दाबेदार हो । अघिल्ला तीनै संस्करणमा नेपाली टोली उपविजेता बनेर फर्केको थियो । फेरी एकपटक च्याम्पियन बन्ने लक्ष्यका साथ नेपाली टोली शनिबार भारतको सिलगुढी यात्रामा निस्किदैछ । स्वभाविक छ, हरेक पटक जस्तै यसपटक पनि च्याम्पियन बनेर फर्कने लक्ष्यका साथ नेपाली टोली त्यहाँ पुग्दैछ । तर, के यो पटक नेपाल सफल होला, पुरानै नतिजाबाट फर्केला वा अहिले सम्मको सफलता भन्दा कमजोर प्रदर्शन गरेर फर्केला ।

विगतका तुलनामा तेपाली टोलीमा यसपटक ठूलो परिवर्तन भएको छ । एकै पटक ७ नयाँ खेलाडीले टोलीमा प्रवेश पाएका छन् । यसपटक टोलीका कमान्डर पनि परिवर्तन भएका छन् । प्रशिक्षकमा नयाँ पुस्ताका कुमार थापाको यहि प्रतियोगितामार्फत परिक्षण हुँदैछ । कम्तिमा टोलीलाई फाइनल सम्म पुर्याउनु पर्ने चुनौति उनी सामू छ । फाइनल जिताउन सके उनको प्रशिक्षण करियरले पनि उचाई लिने सम्भावना रहन्छ । उनले डेब्यू खेलमै मलेसिया जस्तो दक्षिण एसिया भन्दा बाहिरको टोलीलाई केही दिनअघि हराएर उनले सम्भावना त देखाइसकेका छन् । तर, अहिले नै मुल्याङकन गर्ने समय भने आएको छैन ।

भारत साफ च्याम्पियनसिपमा पुरुष जस्तै महिला फुटबलको पनि सदाबहादर दाबेदार हो । महिला साफमा नेपालले हराउन नसकेको एक्लो टोली भारतलाई हराउन सकेको छैन । यसअघि बाँकी सबै प्रतिद्वन्द्वि नेपालका लागि कठिन होइनन् । यसपटक समूह चरणमा नेपालले माल्दिभ्स, भुटान र श्रीलंकासँग प्रतिस्पर्धा गर्नुपर्नेछ ।

विगतको प्रदर्शनलाई आधारमा मान्ने हो भने सेमिफाइनल यसपटक पनि नेपालका लागि सहज छ । अर्को समूहमा रहेका भारत र बंगलादेश नै नेपालका लागि मुख्य चुनौति हुनेछन् । समूह विजेता बनेर अघि बढ्ने बलियो सम्भावना रहेको नेपालले सेमिफाइनलमा बंगलादेशको सामना गर्नुपर्ने हुन सक्छ । बंगलादेशका सञ्चारमाध्यमका अनुसार यसपटक बंगलादेशले राम्रो तयारी गरेको छ । उपाधि जित्नु भन्दा पनि फाइनल पुग्नु बंगलादेशको पहिलो लक्ष्य हो , त्यसका लागि बंगलादेशले नेपाललाई हराउने लक्ष्य पक्कै राखेको हुनुपर्छ ।

स्वदेशमा अन्य खेलाडी सातौं राष्ट्रिय खेलकुदमा आन्तरिक प्रतिस्पर्धा गरिरहँदा महिला टोली भारत यात्रामा निस्किदैछ । त्यहि भारतलाई हराउन सके नेपाल महिला फुटबलमा दक्षिण एसिया च्याम्पियन बनेर फर्कनेछ सम्भावना रहन्छ ।