पोखरा (हाम्रो खेलकुद)– त्रिभुवन आर्मी फुटबल क्लबले नवौं राष्ट्रिय खेलकुदअन्तर्गत पुरुष फुटबलमा विजयी सुरुवात गरेको छ ।

गोस्टेघाट फुटबल मैदानमा शुक्रबार भएको खेलमा आर्मीले लुम्बिनी प्रदेशलाई ४–१ ले हराएको छ । समूह ‘सी’मा आर्मीको जितमा जर्जप्रिन्स कार्की, भरत खवास, दिनेश हेन्जन र नवयुग श्रेष्ठले गोल गरेका थिए । नेपाल पुलिस क्लब पछि समूह सीमा रहेको छ ।

फुटबलको पहिलो दिन एनआरएनए र बागमती प्रदेशले विजयी सुरुवात गरेको थियो । एनआरएनले प्रदेश १ लाई २–० र बागमती प्रदेशले मधेशलाई २–० ले हराएको थियो । तर फुटबलको उद्घाटन खेल भने विवादमा परेको थियो ।

प्रदेश १ ले आफ्नो खेलविरुद्ध खेल्ने ८ खेलाडी नियमानुसार एनआरएनए टोलीबाट खेल्न नमिल्ने भन्दै प्रोटेष्ट (दाबी विरोध) हालेको थियो । त्यसअघि खेल सुरु हुनुअघि नै प्रदेश १ ले खेल्न नमिल्ने बताएको थियो ।

तर, आयोजकले खेलपछि प्रोटेष्ट राख्न सकिने भनेपछि प्रदेश १ खेल्न राजी भएको थियो । प्राविधिक समितिका सचिव प्रचण्ड शर्माले एनआरएनए टोलीले उजुरी परेका खेलाडीको कागजपत्र पेश गरेको र त्यसको अध्ययन गर्न बाँकी रहेको बताएका छन् ।

‘हामीले प्रमाण मागररेका थियौं। उहाँहरुले बुझाउनु भएको छ,’ शर्माले भने, ‘हामी त्यसको अध्ययन पछि ८ खेलाडीका बारेमा निर्णय लिनेछौं । टिमका विरुद्धमा होइन ८ खेलाडीको बारेमा उजुरी परेकाले त्यहि विषयमा मात्र छानविन गर्नेछौं ।’