पोखरा (हाम्रो खेलकुद)– बगर भाई खलक ‘ए’, लायन्स क्लव अफ मुनाल, सिएमजी काठमाडौं,फोर्टी फाउन्डेसन र नाइट किंग पोखरामा जारी भेट्रानको क्वार्टरफाइनलमा पुगेका छन् । पोखराको पुरानो टुडिखेलमा जारी प्रतियोगितामा शुक्रबार बगर भाइ खलक ए ले बुटवल सोसाइटीलाई ३–१ ले हरायो । बगरका लागि बिशाल गुरुङले २ र राजेन्द्र तामाङले एक गोल गरे । बुटवलको लागि शुकलाल तामाङले गोल गरे । बगरका बिशाल म्यान अफ दी म्याच घोषित भए ।

कोमलबहादुर जिसीको गोलमा लायन्स क्लव अफ मुनालले दिप युनाइटेडलाइ १–० ले हरायो । विजयी टोलीका धरम सिंह लामिछाने म्यान अफ दी म्याच घोषित भए । चेतबहादुर श्रेष्ठको ह्याट्रिकमा सिएमजी काठमाडौंले आदिवासी फुटवल क्लवलाई ५–१ ले हरायो । सिएमजीका अनिलराज भण्डारी र राजिव नेपाली समान १ गोल गरे । आदिवासीका हिरा बहादुर थापाले सान्तवना गोल गरे ।

फोर्टी फाउण्डेशनले बुटवल भेट्रानलाई ३–१ ले हरायो । विजयी टोलीका सुदीप केसीले २ र नविन पाण्डेले १ गोल गरे । बुटवलका शेरबहादुर भण्डारीले सान्त्वना गोल फर्काए । फोर्टी फाउन्डेसनका सुदिप म्यान अफ दी म्याच चुनिए । नाइट किंग क्लब सानो गौचरन विरगन्जलाई ४–० ले हरायो । विजयी टोलीका निमा लामा, आकाश गुरुङ, सरोज थापा र मनु गौतमले गोल गरे । निमा म्यान अफ दी म्याच बने ।

शनिबार हुने क्वार्टरफाइनलमा मोसिस काठमाडौं र फोर्टी फाउण्डेशन, सिएमजी काठमाडौं र बिरगन्ज युनाइटेड सिटी, बगर भाइखलक ए र सानो गौचरण तथा रोटरी क्लब अफ मकवानपुर हेटौडा र लायन्स क्लव अफ मुनाल पोखरा प्रतिस्पर्धा हुनेछ ।