एजेन्सी – फिफा विश्वकप २०२२ कतार सुरु हुन एक महिना बाँकी छ । तर उपाधिको प्रमुख दाबेदारको रुपमा हेरिएको अर्जेन्टिनालाई भने विश्वकपअघि चोटका कारण समस्या पर्ने देखिएको छ ।

अर्जेन्टिनाको आक्रमणमा मेस्सीलाई साथ दिने दुई खेलाडी क्लब फुटबलका दौरान चोट बोक्न पुगेका छन् । यसै सिजन युभेन्टस छाडेर एएस रोमा पुगेका फरवार्ड पाउलो डिबाला र पिएसजी छोडेर युभेन्टस पुगेका एन्जल डी मारिया घाइते हुन पुगेका छन् । दुवै खेलाडीको चोट कति गम्भीर भन्ने बाहिर आइसकेको छैन । तर विश्वकपका लागि भने दुवै तयार हुने सम्भावना निकै कम छ ।

डी मारियाले मंगलबार च्याम्पियन्स लिगमा मक्कबी हाइफाविरुद्ध खेलका दौरान चोट बोकेका थिए । ३४ वर्षीय विंगरको दायाँ ह्यामस्ट्रीङमा चोट लागेको हो । गत वर्ष कोपा अमेरिकाको फाइनलमा विजयी गोल गरेका उनी अर्जेन्टिनाको प्रमुख खेलाडी मध्यमा पर्छन् । तर उनले चोट बोकेपछि अब विश्वकपमा खेल्ने सम्भावना कमजोर बनेको छ । सामान्यतया यो चोटले खेलाडी ४ देखि ६ साता बाहिर रहन्छन् ।

यस्तै डिबालाले पनि इटालियन लिगमा लेच्चेविरुद्ध खेलमा चोट बोकेका थिए । पेनाल्टी लिने क्रममा चोट बोकेका उनको स्थिति निकै खराब रहेको प्रशिक्षक जोसे मोउरिन्होले बताए । २८ वर्षीय फरवार्डले आँशु झार्दै मैदान छाडेका थिए ।

मोउरिन्होले खेलको हाफ टाइममा चोटबारे जानकारी दिएका थिए । ‘डिबालाको चोट खराब छ । मैले हेर्दा खराब देखें । तर जब डिबालालाई भेटें, निकै खराब लाग्यो,’ उनले भने ।

अर्जेन्टिना विश्वकपमा खेल्नुअघि ३५ खेलको अपराजित यात्रामा छ । विश्वकपको उपाधि दाबेदार मानिएको टोलीका दुई मुख्य खेलाडी नहुँदा प्रशिक्षक लिओनेल स्कालोनीलाई कठिन हुन सक्छ ।

अर्जेन्टिना विश्वकपको समूह सी मा रहेको छ । अर्जेन्टिनाको समूहमा साउदी अरब, मेक्सिको र पोल्यान्ड रहेका छन् ।