एजेन्सी – युवा फरवार्ड किलीयन एमबाप्पे पेरिस सेन्ट जर्मेन (पिएसजी) सँग असन्तुष्ट रहेको र क्लब छाड्न चाहेको चर्चा मंगलबार युरोपेली संचारमाध्यममा छायो । तर क्लबले भने एमबाप्पेले क्लबसमक्ष त्यस्तो कुरा नगरेको बताएको छ ।

पिएसजीले च्याम्पियन्स लिगमा बेन्फिकासँग खेल्नुअघि क्लबका खेल निर्देशक लुइस काम्पोसले एमबाप्पेले क्लब छाड्नेबारे केही नभनेको जानकारी दिए । ‘म एमबाप्पेलाई दैनिक भेट्छु । तर उनले हालसम्म मलाई क्लब छोड्नेबारे केही भनेका छैनन्,’ काम्पोसले भने ।

‘यो खेलाडीले भनेको कुरा नै होइन । यो त संचारमाध्यममा आएको हो । च्याम्पियन्स लिगको महत्त्वपूर्ण खेलअघि यस्तो चर्चाले हामीलाई असर गर्छ,’ उनले भने, ‘म त्यसैले यहाँ आएको छु । एमबाप्पेले मलाई वा अध्यक्ष अल खलिफालाई क्लब छाड्नेबारे भनेका छैनन् । हामी उनको अवस्थालाई लिएर खुसी छौं ।’

काम्पोसले एमबाप्पेले क्लबको लागि निकै मिहिनेत गरिरहेको पनि बताए । ‘किलीयन उच्च कोटिका खेलाडी हुन् । उदाहरणका लागि राइम्सविरुद्ध खेलमा उनले बिरामी भएपनि खेले । उनले टोलीका लागि मिहिनेत गरे । म उनलाई टोलीमा सबैसँग मिलेको देख्छु । उनी खुसी छन् र आफ्नो इच्छाले यहाँ आएका छन्,’ उनले थपे ।

एमबाप्पेले सन् २०१७ मा पिएसजी आएयता ११ उपाधि जितिसकेका छन् । उनले ४ पटक फ्रान्सेली लिगको उपाधि पनि जिते । फ्रान्सका लागि विश्वकप जितिसकेका उनी अर्को महिना सुरु हुने विश्वकपमा पनि केन्द्रमा रहनेछन् ।