एजेन्सी – नेदरल्यान्ड्सको राष्ट्रिय टोली र डच क्लब पिएसभी आइन्डोभनका विंगर कोडी गाक्पो पुन: एकपटक चर्चामा आएका छन् । उच्च लयमा रहेका उनलाई प्रिमियर लिगका क्लबसँगै रियल म्याड्रिडले पनि नजिकबाट नियालिरहेको युरोपेली संचारमाध्यमले जनाएका छन् ।

गत वर्ष राष्ट्रिय टोलीका लागि डेब्यु गरेका गाक्पो लेफ्ट विंगमा खेल्ने गर्दछन् । रियल म्याड्रिडले उक्त पोजिसनमा भिनिसियस जुनिअर उपस्थित रहेपनि भविष्यमा गाक्पो आफ्नो योजनामा पर्न सक्ने खेलाडीको रुपमा हेरेको छ । २३ वर्षीय विंगरले जारी सिजन पिएसभीका लागि उच्च प्रदर्शन गरिरहेका छन् ।

त्यसो त गाक्पोको नाम गत ट्रान्सफर विन्डोमा म्यानचेस्टर युनाइटेडसँग पनि जोडिएको थियो । तर प्रशिक्षक एरिक टेन हागले आफ्नो पूर्व क्लब आयाक्सका एन्टोनी सान्तोसलाई रोजेपछि गाक्पोको ट्रान्सफर सफल हुन सकेन । लिड्स युनाइटेडले गाक्पोलाई अनुबन्ध गर्न इच्छा जाहेर गरेपनि खेलाडी आफैंले लिड्सलाई सहि गन्तव्य मानेनन् ।

गाक्पो र पिएसभीबीच सन् २०२६ सम्मको सम्झौता रहेको छ । पिएसभीले गत ट्रान्सफर विन्डोमा ५० मिलियन युरो माग राखेको थियो । तर क्लबले ३० मिलियन युरोसम्म सम्झौता गर्न तयार रहने देखिन्छ ।

गाक्पोले विश्वकप अघि अन्यत्र जाँदा आफ्नो राष्ट्रिय टोलीमा पर्ने सम्भावना कमजोर रहने आँकलन गरेको पनि चर्चा चलेको छ । त्यसकै नतिजास्वरूप उनले जारी सिजन उच्च प्रदर्शन गरेका छन् । डच लिगको शीर्ष गोलकर्ता रहेका उनले ९ खेलमा ९ गोल गरेका छन् । युरोपा लिगमा पनि उनले ३ गोल थपेका छन् । सन् २०२१ जुनयता राष्ट्रिय टोलीका लागि ९ खेलमा ३ गोल उनको नाममा रहेको छ ।