काठमाडौं (हाम्रो खेलकुद)– पूर्व खेलाडी र खेल पदाधिकारी गरि एक दर्जन मंसिर ४ गते हुने संघिय र प्रदेश सभा सदस्य निर्वाचनमा मैदानमा उत्रेका छन् । नेपाल ओलम्पिक कमिटी (एनओसी) का अध्यक्ष समेत रहेका संस्कृती पर्यटन तथा नागरिक उड्यन मन्त्री जीवनराम श्रेष्ठदेखि पूर्व अन्तर्राष्ट्रिय भलिबल खेलाडी रमेश खरेल संघिय सदस्यका लागि उम्मेदवारी दर्ता गराएका छन् ।

नेपाल स्की संघको अध्यक्ष समेत रहेका श्रेष्ठ दुई पटक राष्ट्रिय खेलकुद परिषद् (राखेप) का सदस्य सचिव बनिसकेका छन् । नेकपा समाजवादीका श्रेष्ठ पाँच दलिय गठबन्धनबाट काठमाडौं क्षेत्र नं ८ मा उम्मेदवारी दिएका हुन् । उनी यसअघि पनि सोही क्षेत्रबाट निर्वाचित भएका थिए ।

पूर्व फुटबल खेलाडी तथा एन्फाका पूर्व अध्यक्ष कमल थापा मकवानपुर क्षेत्र नं १ बाट उम्मेदवार बनेका छन् । नेपाल राष्ट्रिय प्रजातन्त्र पार्टी (राप्रपा) नेपालका अध्यक्ष समेत रहेका पूर्व उपप्रधान मन्त्री नेकपा एमालेको सूर्य चिन्ह लिएर मैदानमा उत्रेका छन् ।

एनओसीका पूर्व अध्यक्ष तथा नेपाल जिम्याष्टिक संघका अध्यक्ष ध्रुबबहादुर प्रधान नवलपरासी पश्चिम क्षेत्र नं २ बाट राप्रपाको प्रत्यासी छन् । प्रधान नेपाल प्रहरीका पूर्व महानिरिक्षक हुन् । प्रहरीका पूर्व डिआइजी खरेल नेपाल सुशासन पार्टीबाट काठमाडौं क्षेत्र नं १ बाट चुनावी मैदानमा रहेका छन् । कराते प्रशिक्षक तथा नेपाल गणतान्त्रिक खेलकुद महासंघका संस्थापक अध्यक्ष ध्रुव विक्रम मल्ल राप्रपाबाट काठमाडौं ७ को निर्वाचनमा प्रतिस्पर्धा गर्दैछन् । केहि वर्ष अघि राप्रपामा प्रवेश गरेका मल्ल पार्टीको खेलकुद विभाग प्रमुख हुन् ।

लुम्बिनी प्रदेशमा ३ खेलकर्मी मैदानमा

पूर्व खेलाडी तथा खेलकर्मी गरि आधा दर्जन भन्दा बढी प्रदेश सभाको निर्वाचनमा होमिएका छन् । यसअघि पनि प्रदेश सांसद रहिसकेका ओलम्पियन सुरेन्द्र हमाल र दीपक कोइरालालाई यसपटक पनि सम्बन्धित पार्टीले प्रतिस्पर्धामा उतारेको छ । नेपाली कांग्रेसले राखेपका पूर्व कोषाध्यक्ष समेत रहेका हमाल बाँके २ कबाट र नेकपा माओवादीले नेपाल क्रिकेट संघ (क्यान) का पूर्व कार्यवहाक अध्यक्ष दीपक कोइराला कास्की १ कबाट उम्मेदवार बनाएको छ । हमाल प्रदेश सरकारका मन्त्री हन् ।

राखेपका पूर्व कोषाध्यक्ष मीनकृष्ण महर्जनलाई कांग्रेसले ललितपुर क्षेत्र १ खको उम्मेदवार बनाएको छ । करातेका पूर्व अन्तर्राष्ट्रिय खेलाडी समेत रहेका महर्जन यसअघि पनि सोही प्रदेशबाट प्रत्यासी थिए । अखिल नेपाल फुटबल संघ (एन्फा) का उपाध्यक्ष दीर्घबहादुर केसी (कुमार) लाई कांग्रेसले रुपन्देही क्षेत्र नं २ कबाट उठाएको छ । पटक पटक रुपन्देही जिल्ला फुटबल संघको अध्यक्ष रहिसकेका केसी एनओसीका सदस्य हुन् ।

नेपाल भलिबल संघका उपाध्यक्ष भीम ओली एमालेबाट बाँके ३ खबाट प्रत्यासी बनेका छन् । उनी लुम्बिनी खेलकुद विकास परिषद्का पूर्व सदस्य सचिव तथा तत्कालिन मध्यपश्चिमाञ्चल खेलकुद विकास समितिका अध्यक्ष हुन् । उनकै समयमा २०७६ मा लुम्बिनी प्रदेशमा आठौं राष्ट्रिय खेलकुद आयोजना भएको थियो ।

राखेपका कर्मचारी समेत रहेका प्रकाश बरालाई कांग्रेसले कार्की क्षेत्र नं ३ खबाट मैदानमा उतारेको छ । बराल टाइगर कप भलिबल प्रतियोगिताको आयोजक टाइगर ग्रुप पोखरा नेपालका महासचिव हुन् । तेक्वान्दो प्रशिक्षक अशोक खड्काले काठमाडौं क्षेत्र नं २ खबाट स्वतन्त्र उम्मेदवारी दिएका छन् । उनी नेपाल तेक्वान्दो संघको काठमाडौं जिल्ला अध्यक्ष समेत हुन् ।

संघिय सांसदका खेलकर्मी उम्मेदवार

-जीवनराम श्रेष्ठ, नेकपा समाजवादी (काठमाडौं क्षेत्र नं ८)

-कमल थापा, राप्रपा नेपाल (मकवानपुर क्षेत्र नं १)

-ध्रुबबहादुर प्रधान, राप्रपा (नवलपारी पश्चिम क्षेत्र नं २)

-रमेश खरेल, नेपाल सुशासन पार्टी ( काठमाडौं क्षेत्र नं १)

-ध्रुबविक्रम मल्ल, राप्रपा (काठमाडौं क्षेत्र नं ७)

प्रदेश सांसदका खेलकर्मी उम्मेदवार

-सुरेन्द्र हमाल, नेपाली कांग्रेस (बाँके क्षेत्र नं २,क)

-दीर्घबहादुर केसी (कुमार), नेपाली कांग्रेस ( रुपन्देही, क्षेत्र नं २,क )

-मीनकृष्ण महर्जन, नेपाली कांग्रेस (ललिपुतर १,ख)

-भीम ओली, नेकपा एमाले ( बाँके क्षेत्र नं ३ ख)

-प्रकाश बराल, नेपाल कांग्रेस ( कास्की क्षेत्र नं ३,ख)

-दीपक कोइराला, नेकपा माओवादी (कास्की क्षेत्र नं १, क)

-अशोक खड्का, स्वतन्त्र (काठमाडौं क्षेत्र नं २,ख)

यो पनि : खेलकुद मन्त्री गहतराज बाँके १ बाट उम्मेदवार