काठमाडौं (हाम्रो खेलकुद) – भियतनाममा जारी एएफसी यू–१७ एसियन कप छनोटमा नेपालले पहिलो गोल गरेको छ । नेपाल र चाइनिज ताइपेबीच जारी खेलमा १–१ को बराबरी भएको छ । नेपालका लागि कप्तान प्रशान्त लक्षमले बराबरी गोल फर्काएका थिए । रिबाउन्डमा प्राप्त बलमा उनले गोल गरेका थिए ।

तेस्रो खेलमा नेपालको यो पहिलो गोल हो । त्यसअघि तेस्रो मिनेटमा लिन हाइ चिङको गोलमा चाइनिज ताइपेले अग्रता लिएको थियो । यसअघि नेपाल पहिलो खेलमा थाइल्यान्डसँग ३–० र आयोजक भियतनामसँग ५–० ले पराजित भएको थियो ।

समूह ‘एफ’को छनोट चरणबाटै बाहिरि सकेका नेपाल र चाइनिज ताइपेबीचको यो खेललाई प्रतिष्ठाको लडाईका रुपमा हेरिएको छ। भियतनाम र थाइल्यान्डबीच समूह विजेताका लागि प्रतिस्पर्धा हुनेछ ।

भियतनामसँगको खेलमा भन्दा मुख्य प्रशिक्षक उर्जन श्रेष्ठले २ खेलाडी परिवर्तन गरेका थिए। डिफेन्डर आश्विन घोरासैनीको स्थानमा विक्रम तामांङ मैदानमा छन् । युनेश बुढाथोकीलाई बेन्चमा राख्दै प्रशिक्षक श्रेष्ठले सरोज दर्लामीलाई मौका दिएका हुन् ।

नेपालको सुरुवाती – ११

गोल रक्षकः क्रिशल मोक्तान
डिफेन्सः सिमान्त थापा, बिक्रम तामांङ, दिपक थापा मगर र निशान्त तामाङ
मिडफिल्डः प्रशान्त लक्क्षम (कप्तान), सरोज दर्लामी, लछु थापा, निरज कार्की र हरिश राज भट्ट
फरवार्डः सुवाश बम