एजेन्सी – इंग्लिस प्रिमियर लिगमा लन्डन क्लब चेल्सीले क्रिस्टल प्यालेसमाथि पूनरागमन जित निकालेको छ । चेल्सीले क्रिस्टल प्यालेसलाई उसकै मैदानमा २–१ को पूनरागमन जित निकालेको हो ।

सेलह्रस्ट पार्क लन्डनमा चेल्सीको जितमा पिएरे इमिरिक औवामियाङ र कोनोर गल्लाघेरले गोल गरे । क्रिस्टल प्यालेसका ओडसोनी इडुआर्डले एक गोल फर्काए ।

खेलको सातौं मिनेटमा ओडसोनी इडुआर्डको गोलबाट घरेलु टोली प्यालेसले १–० को अग्रता लिएको थियो । ३८औं मिनेटमा औवामियाङले गोल गर्दै खेललाई पहिलो हाफमा १–१ गोलको बराबरीमा ल्याए । त्यसपछि परिवर्तित खेलाडी कोनोर गल्लाघेरले इन्ज्युरी समयमा गोल गर्दै चेल्सीलाई महत्वपूर्ण ३ अंक दिलाए ।

७६औं मिनेटमा काई हाभर्टजको स्थानमा मैदान छिरेका गल्लाघेरले इन्ज्युरी समयको थप गरिएको पहिलो मिनेटमा क्रिस्टियन पुलिसिसको पासमा गोल गर्न सफल भएका थिए ।

यस जितसँगै चेल्सी ७ खेलबाट १३ अंक जोडेर पाँचौं स्थानमा उक्लिएको छ । पराजित क्रिस्टल प्यालेस ६ अंक जोडेर १७औं स्थानमा रहेको छ ।

प्रिमियर लिगकै अर्काे खेलमा न्यूक्यासलले फुलहमलाई ४–१ ले पराजित गर्दा बर्नमाउथ र ब्रेन्टफर्डले गोलरहित बराबरी खेल्दै अंक बाँडेका छन् । यस्तै एभर्टनले साउथह्याम्टनलाई २–१ ले तथा वेस्ट ह्यामले वल्भ्सलाई २–० ले पराजित गरेको छ ।