एजेन्सी – ढिला होस् या चाँडो सबै कुराले नेयमारले ब्राजिल तथा विश्व फुटबलका लेजेन्ड पेलेलाई उछिनेर ब्राजिलको राष्ट्रिय टोलीको इतिहासमा शीर्ष गोलकर्ता बन्ने देखिन्छ ।

नेयमारले २०२२ को विश्वकपमा राष्ट्रिय टोलीको नेतृत्व गर्दै सर्वाधिक गोलकर्ता बन्ने लक्ष्य राखेको छ । नेयमारलाई कति गोल चाहिन्छ भन्नेमा फरक–फरक विवरणहरू छन् ।

‘राष्ट्रिय टोलीका लागि शीर्ष स्कोरर बन्न पाउनु ठूलो सम्मानको कुरा हुनेछ र यदि मैले त्यस्तो सोचेको छैन भनेँ भने म झूट बोल्छु । निस्सन्देह, यो मेरो व्यक्तिगत लक्ष्यहरू मध्ये एक हो । म यसलाई प्राप्त गर्ने आशा गर्दछु । मैले ब्राजिलका सबैका लागि आइडल पेलेको कीर्तिमान तोड्न सक्छु ।’ नेयमारले फेब्रुअरीमा भनेका थिए ।

ट्युनिसियाविरुद्धको गोलपछि नेयमारले ब्राजिलको जर्सीमा ७५ आधिकारिक गोल गरेका छन् । विश्व फुटबलको सर्वोच्च निकाय (फिफा)का अनुसार पेलेले ७७ अन्तर्राष्ट्रिय गोल गरेका छन् ।

ब्राजिल फुटबल फेडेरेसन (सिविएफ) का अनुसार पेलेको नाममा ९५ भन्दा धेरै गोल छ । तर फिफाले ७७ गोललाई मात्रै मान्यता दिएको छ ।

नेयमारले ओलम्पिक खेलहरूमा गरेका गोलहरूलाई गणना गरिएको छैन । ओलम्पिकमा यू२३ टोली रहने भएकाले त्यसमा भएका गोललाई सिनियर टोलीमा मान्यता दिइदैन ।

फ्रान्सेली क्लब पेरिस सेन्ट जर्मेन (पीएसजी) का फरवार्ड नेयमारले लन्डनमा (तीन गोल गर्दै) रजत र रियोमा (चार गोल गर्दै) स्वर्ण जितेका थिए । उनले सात गोललाई सिनियर टोलीमा गणना गरिएको छैन ।