बंगलादेशविरुद्ध नेपालको सुरुवाती ११ घोषणा

काठमाडौं (हाम्रो खेलकुद) – बंगलादेशसँगको अन्तर्राष्ट्रिय मैत्रीपूर्ण खेलको लागि नेपालको सुरुवाती ११ सार्वजनिक भएको छ ।

नेपाली टोलीका कार्यवहाक मुख्य प्रशिक्षक प्रदिप हुमागाईंको गोलरक्षक तथा कप्तान किरण चेम्जोङको कप्तानीमा नेपालको सुरुवाती ११ घोषणा गरेका हुन् ।

नेपालको पोस्ट किरणले सम्हाल्दा डिफेन्समा रोहित चन्द, अनन्त तामाङ, दिनेश राजवंशी र सुमन अर्याल रहेका छन् । मिडफिल्डमा तेज तामाङ, सेसेहाङ आङ्देम्वे, विशाल राई र सुजल श्रेष्ठ तथा फरवार्डमा विमल घर्तीमगर र अन्जन विष्ट रहेका छन् ।

नेपाल र बंगलादेशबीच हालसम्म २६ पटक भेट हुदा बंगलादेश १४ खेलमा विजयी भएको छ । नेपाल ७ खेलमा विजयी हुँदा ५ खेल बराबरीमा सकिएको छ । पछिल्लो चार खेलमा अपराजित नेपाल सोही अपराजित लयलाई निरन्तरता दिँदै मैदान उत्रने लक्ष्यमा हुनेछ ।

नेपालले पछिल्लोपटक गत वर्ष माल्दिभ्समा भएको साफ च्याम्पियनसिपमा बंगलादेशसँग १–१ गोलको बराबरी खेलेको थियो । त्यसअघि नेपालमै भएको थ्री नेसन्स कपमा बंगलादेशलाई २–१ ले हराएर उपाधि जितेको थियो ।

थ्री नेसन्स कपकै लिग चरणमा गोलरहित बराबरी र त्यो भन्दा अघि बंगलादेशमा भएको पहिलो मैत्रीपूर्ण खेल २–० ले गुमाएको नेपालले त्यसपछि गोलरहित बराबरी खेलेको थियो ।