काठमाडौं (हाम्रो खेलकुद)– अखिल नेपाल फुटबल संघ (एन्फा) ले दशरथ रंगशालामा अन्तर्राष्ट्रिय फुटबल हेर्नका लागि अहिले सम्मकै महंगो टिकट दर तोकेको छ । नेपाल र बंगलादेशबीच मंगलबार हुने मैत्रीपूर्ण खेलका लागि चर्को मुल्यको टिकट विक्री गर्ने तयारी गरेको छ ।

खेल मंगलबार साँझ ५ः३० बजे सुरु हुनेछ । त्यो खेलका लागि एन्फाले भिआइपीतर्फका सिमिति सिटको प्रति टिकटको मुल्य ५ हजार सम्म तोकेको छ । एन्फाका महासचिव किरण राईले सहजै फुटबल हेर्न चाहने र फुटबललाई सहयोग गर्न चाहनेका लागि ५ हजार दरको सिमित टिकट विक्री गरिने जानकारी दिए ।

‘फुटबललाई सहयोग गर्न चाहनेको भावनाको कदर होस् र त्यस्ता व्यक्तिलाई सजिलै टिकट लिन सकियोस् भन्नका लागि यो निर्णय गरिएको हो,’ राईले भने,‘ यो एउटा प्रयोग पनि हो । ८० वटा सिट ५ हजार टिकटका लागि छुट्टाएका छौं ।’

भिआईपीतर्फ अतिथी केहि तलका सिटमा ५ हजार दरको टिकट किन्नेका लागि राख्ने व्यवस्था मिलाइने राईले बताए । यसअघि भिआइपीतर्फ एन्फाले २ हजार रुपैयाँ सम्मको टिकट विक्री गरेको थियो । मैत्रीपूर्ण खेलका लागि भिआइपीतर्फ बाँकी सिटका लागि भने १ हजार तथा साधारण तर्फ प्रति टिकट ५ सय रुपैयाँ तोकिएको एन्फाले जनाएको छ ।

२०७७ को चैतमा भएको थ्री नेसन्स कपको फाइनलमा भिआइपीतर्फ २ हजार र साधारणतर्फ १ हजार रुपैयाँको टिकट दर तोकेको थियो । थ्री नेसन्सको फाइनलमा नेपालले बंगलादेशलाई २–१ ले हराएको थियो ।

नेपाल र बंगलादेशीबीचको मंगलबार हुने खेलको टिकट विक्री सोही दिन बिहान एन्फाले नै गर्ने महासचिव राईले जानकारी दिए । ‘टिकटको विक्रीका लागि बिडिङ निकालेका थियौं । कोहि इच्छुक देखिनुभएन,’ उनले भने,‘ त्यसैले खेलको दिन बिहान रंगशाला बाहिर भौतिक रुपमै एन्फाले नै टिकट विक्री गर्नेछ।’