कैलाली (हाम्रो खेलकुद) – कर्णाली प्रदेश र लुम्बिनी प्रदेश कैलालीको धनगढीमा जारी सुदूरपश्चिम राजधानी कप राष्ट्रिय फुटबल प्रतियोगिताको सेमिफाइनलमा प्रवेश गरेका छन् ।

पहिलो दिन नै भएको खेल पूरा हुन नसक्दा आइतबार खेल हुँदा सुदुरपश्चिम प्रदेश रातोलाई सडनडेथमा ५–४ ले हराएर कर्णालीले अन्तिम चारमा स्थान पक्का गरेको हो ।

लगातारको बर्षाले धनगढी रंगशाला हिलाम्मे भएपछि मैदान परिर्वतन गर्दै फाप्ला मैदानमा खेल भएको थियो । अब कर्णाली प्रदेशले फाइनल प्रवेशका लागि प्रदेश नम्बर १ र बागमति प्रदेश बीचको विजेतासँग खेल्नेछ ।

आइतबारै लुम्बिनी प्रदेशले मधेश प्रदेशलाई ४–२ ले पराजित गर्दै सेमिफाइनलमा स्थान बनाएको छ । फाइनल पुग्नका लागि लुम्बिनी प्रदेशले गण्डकी प्रदेश र सुदुरपश्चिम प्रदेश निलो बीच हुने खेलको विजेतासँग खेल्नेछ ।

सोमबार गण्डकी प्रदेश र सुदुरपश्चिम प्रदेश निलो बीच खेल हुनेछ । पिएफए स्पोटर््स क्लब अत्तरियाको आयोजनामा भईरहेको प्रतियोगिता १५ असोजसम्म सञ्चालन हुनेछ ।

प्रतियोगिताको विजेताले नगद ५ लाखसहित ट्रफी मेडल र प्रमाणपत्र पाउनेछन । उप विजेताले नगद ३ लाखसहित ट्रफी मेडल र प्रमाणपत्र प्राप्त गर्नेछन् । प्रतियोगीतामा विभिन्न विधाका उत्कृष्ट खेलाडीहरुले जनही १० हजार नगद पाउँदा उत्कृष्ट खेलाडीले नगद २० हजार प्राप्त गर्नेछ ।