पुलिस महिला फुटबल उपाधि नजिक

दीपेन्द्र पोखरेल दुहबी (हाम्रो खेलकुद)– नेपाल पुलिस क्लब सुनसरीको दुहबीमा जारी सातौ राष्ट्रिय खेलकुद अन्तर्गतको महिला फुटबलको उपाधि नजिक पुगेको छ।

दुहबी रंगशालामा शुक्रबार भएको सेमिफाइनलमा मध्यमाञ्चललाई ५–० ले हराउदै पुलिसले अन्तिम दुईको यात्रा तय गरेको हो । पुलिसको जितमा निरु थापाले ह्याट्रिक गरिन् भने थप दुई गोल निर्मला उपाध्यायले गरिन् । पुलिस अब एपिएफ र त्रिभुवन आर्मी क्लबको विजेतासँग फाइनल खेल्नेछ । एपिएफ र आर्मीको खेल पनि आजै हुनेछ ।

तेस्रो मिनेटमा गोल गरेकी निरुले र निर्मलाले पाँचौं मिनेटमा गोल गरिन् । निरुले २९ औं मिनेटमा र निर्मलाले ४३ औं मिनेट फेरी गोल गरे । निरुले ५१ औं मिनेटमा अर्को गोल गर्दै ह्याट्रिक पुरा गरिन् । पुलिसकी सृजना खड्का प्लेयर अफ दी म्याच घोषित भइन् ।