काठमाडौं (हाम्रो खेलकुद) – नेपाली राष्ट्रिय टोलीका गोलरक्षक किरण चेम्जोङ भोली (आइतबार) नेपाल आइपुग्ने भएको छ । उनले आइतबार साँझ नेपाल आइपुग्ने हाम्रो खेलकुदलाई जानकारी गराए ।

उनी भारतीय आइ लिग क्लब राउन्ड ग्लास पन्जावको प्रशिक्षणमा रहेका छन् । विवाह अघि उनी केही दिन राष्ट्रिय टोलीको प्रशिक्षणमा बसेका थिए । विवाहपछि भने उनी माल्दिभ्स गएका थिए ।

‘जम्सेदपुरबाट दिल्ली आएर भोली साँझ काठमाडौं आइपुग्ने छु । यहाँ राउन्ड ग्लास पन्जावको पनि प्रशिक्षण चलिरहेको छ । खेलेको भोलीपल्टै (बुधबार) भारत जानेछु ।’ किरणले भने, ‘बंगलादेशसँगको खेलको लागि उत्साहित छु । आशा छ खेल राम्रो नै हुनेछ ।’ उनले बंगलादेश र कम्वोडियाबीचको खेल हेरेको र कम्वोडियाले खेल राम्रो खेलेपनि काउन्टर अट्याकमा गोल खाएको बताए ।

राष्ट्रिय टोलीबाट सर्वाधिक क्याप जितेका किरण गत जेठमा भएको एसियन कप छनोटमा भने टोलीमा थिएनन् । मुख्य प्रशिक्षक अब्दुल्लाह अल्मुताइरीसँग विवादपछि १० खेलाडीले प्रशिक्षण छाड्नु परेपछि किरणले उनीहरुलाई साथ दिने समाजिक सञ्जालमार्फत जनाएका थिए ।

त्यहि कारण उनलाई अल्मुताइरीले टोलीमा सामेल गराएका थिएनन् । त्यसपछि उनले राष्ट्रिय टोलीबाट एसियन कप छनोटको तीन खेलसँगै दुई मैत्रीपुर्ण खेल गुमाएका थिए । किरण पछिल्लोपटक नेपालमा भएको मरिससविरुद्धको दुई मैत्रीपूर्ण खेल खेलेका थिए ।

गत महिना नै भारतीय (आई) लिग टोली राउन्ड ग्लास पन्जाब एफसीमा आबद्ध भएका किरणलाई क्लबले शुक्रबार मात्रै आधिकारिक रुपमा सार्वजनिक गरेको थियो ।

नेपाली पुरुष राष्ट्रिय फुटबल टोलीका कार्यवहाक मुख्य प्रशिक्षक प्रदिप हुमागाईले बंगलादेशसँगको मैत्रीपूर्ण खेलको लागि चार गोलरक्षकसहित २३ सदस्यीय टोली घोषणा गरिसकेका छन् ।