काठमाडौं (हाम्रो खेलकुद)– नेपाली राष्ट्रिय फुटबल टोलीसँगको मैत्रीपूर्ण खेलका लागि बंगलादेशको राष्ट्रिय फुटबल टोली शुक्रबार राती काठमाडौं आइपुगेको छ । नेपाल र बंगलादेशबीचको खेल मंगलबार साँझ दशरथ रंगशालमा हुनेछ ।

अखिल नेपाल फुटबल संघ (एन्फा) का केन्द्रिय सदस्यद्वय रविन चन्द र पुरुषोत्तम थापाले बंगलादेशी टोलीलाई त्रिभुवन अन्तर्राष्ट्रिय विमानस्थलमा स्वागत गरेको एन्फाले जनाएको छ । कम्बोडियासँगको मैत्रीपूर्ण खेलेर बंगलादेश टोली सिधै काठमाडौं आएको हो । बिहीबार भएको खेलमा बंगलादेशले कम्बोडियालाई १–० ले हराएको थियो । नेपाल र बंगलादेश झण्डै एक वर्षपछि एकअर्काको सामना गर्दैछन् ।

गत वर्ष माल्दिभ्समा भएको साफ च्याम्पियनसिपको समूह चरणको आफ्नो अन्तिम खेलमा यी दुई टोलीबीच भेट भएको थियो । त्यो खेल १–१ को बराबरी गरेपछि नेपाल साफ च्याम्पिनयसिप इतिहासमा पहिलो पटक फाइनल पुगेको थियो । बंगलादेश भने चौथो स्थानमा रहँदै च्याम्पियनसिपबाट बाहिरिएको थियो ।

त्यसअघि २०७७ को चैतमा दशरथ रंगशालामा भएको थ्री नेसन्स कपमा भाग लिन बंगलादेश नेपाल आएको थियो । कीर्तिस्तान यू २३ को सहभागिता रहेको च्याम्पिनयसिपमा नेपाल र बंगलादेशले फाइनल खेलेका थिए । फाइनलमा नेपालले बंगलादेशलाई २–१ ले हराएको थियो । त्यसअघि राउन्ड रोविनमा यी दुई टोलीले गोलरहित बराबरी खेलेका थिए ।

फाइनलमा एक गोल र विशाल राईको गोलमा एसिस्ट गरेको सन्जोक राई भने यसपटक टोली नै अटाएनन् । ४ गोलकिपर राख्दै कार्यवहाक प्रशिक्षक प्रदीप हुमागाईले बिहीबार २३ सदस्यीय राष्ट्रिय टोलीको घोषणा गरेका थिए ।