एजेन्सी – युइएफए नेसन्स लिग खेल्ने तयारीमा रहेको जर्मनीका दुई खेलाडीलाई कोरोना संक्रमण पुष्टि भएको छ । कप्तान तथा गोलरक्षक म्यानुअल नुयर र मिडफिल्डर लियोन गोरेट्जकालाई कोरोना पुष्टि भएको हो ।

यससँगै यि दुई खेलाडीले यसै साता हुने नेसन्स लिगका दुई खेल गुमाउने भएका छन् । जर्मनीले यसै साता हंगेरी र इंग्ल्यान्डसँग खेल्ने तालिका छ । जर्मनीले चोटकै कारण युवा स्टार मिडफिल्डर जमल मुसिएला र मार्काे रिउसलाई गुमाइसकेको छ ।

३६ वर्षीय नुयर र २७ वर्षीय लियोन जर्मन क्लब बायर्नका सहयात्रीसमेत हुन् । कोरोना भएसँगै उनीहरु फ्रान्कफुर्टमा रहेको जर्मनीको प्रशिक्षण क्याम्प छाडेर अलग्गै बसिसकेका छन् ।

नुयरको स्थानमा होफेनहेमा गोलरक्षक ओलिभर बाउम्यानलाई टोलीमा बोलाइएको छ । एक खेलाडीको नजिकको व्यक्तिलाई कोरोना भएपछि सबै खेलाडीको परिक्षण गर्दा दुई जनालाई कोरोना भएको जर्मन फुटबल एसोसिएसनले जनाएको छ । अब सबै खेलाडी र अफिसियलको दैनिक कोरोना परिक्षण हुनेछ ।

जर्मनीले शुक्रबार वेम्वलीमा इंग्ल्यान्डसँग प्रतिस्पर्धा गर्नुअघि शुक्रबार हंगेरीसँग खेल्नेछ । नेसन्स लिग ए ग्रुप ३ मा जर्मनी ४ खेलबाट ६ अंक जोडेर दोस्रो स्थानमा रहेको छ । हंगेरी ७ अंक जोडेर शीर्षस्थानमा रहेको छ । इटाली ५ अंक जोडेर तेस्रो तथा इंग्ल्यान्ड २ अंक जोडेर पुछारमा छ ।