काठमाडौं (हाम्रो खेलकुद) – बंगलादेशले पहिलो पटक महिला साफ च्याम्पियनसिपको उपाधि जितेको छ । फाइनलमा घरेलु टोली नेपाललाई ३-१ ले पराजित गर्दै बंगलादेशले ऐतिहासिक उपाधि जितेको हो ।

दशरथ रंगशालामा सोमबार घरेलु टोलीलाई स्तब्ध पार्न बंगलादेशकी कृष्णारानी सरकारले २ गोल गरिन । सम्सुनाहारले सुरुवाती अग्रता दिलाउँदा नेपालका लागि अनिता बस्नेतको गोल सान्तवना सावित भयो । पहिलो हाफमा २-० ले अग्रता लिएको बंगलादेशविरुद्ध नेपालले एक गोल फर्काएपनि गोलरक्षकको कमजोरीको फाइदा उठाउँदै बंगलादेशले पुन: २ गोलको अग्रता लियो । थप समयमा गोल हुन नसक्दा बंगलादेशले पहिलो पटक नेपाललाई हराउँदै उपाधि जितेको हो ।

१५ हजार दर्शकसामु खेलको पहिलो मिनेटमै कृष्णारानी सरकारको प्रहार गोलरक्षक एन्जिला तुम्बापो सुब्बाले फुस्काइन् । रिबाउन्डमा आएको प्रहारलाई उनले कर्नर बनाएकी थिइन् । लगत्तै अर्कोतर्फ नेपालकी दीपा शाहीले पेनाल्टी क्षेत्र बाहिरबाट गरेको प्रहार गोलरक्षक रुपना चक्माले बचाइन् ।

बंगलादेशले खेलको दशौं मिनेटमा नै खेलाडी परिवर्तन गर्यो । पछिल्लो खेलमा चोट बोकेपनि सुरुवात गरेकी मोसमत सोप्नाको स्थानमा साम्सुनाहार मैदान प्रवेश गरिन् । मैदान छिरेको ३ मिनेटमै साम्सुनाहारले गोल गरिन् । उनले मोनिका चक्माको क्रसलाई पहिलो टचमै पोस्टको दिशा दिइन् । गोलरक्षक तथा कप्तान एन्जिला तुम्बापो सुब्बाको टाउको माथिबाट बल गोल भएको थियो ।

२२ औं मिनेटमा प्रिती राईको पासमा सरु लिम्बुले गरेको प्रहार डिफेन्डरले ब्लक गर्दै गोलरक्षकसम्म पुग्न दिइनन् । खेलको ३६ औं मिनेटमा अनिता बस्नेतको फ्रिकिकलाई गोलरक्षक रुपनाले डाइभ दिँदै उत्कृष्ट बचाउ गरिन् । त्यसपछि प्राप्त कर्नरमा नेपालले खेल बराबरी गर्ने सुवर्ण अवसर गुमायो । गोलरक्षक बिट भइसकेको अवस्थामा गोललाइन अघि बंगलादेशका डिफेन्डरले तेस्रो प्रयासमा बल क्लियर गरिन् ।

४१ औं मिनेटमा बंगलादेशले अग्रता दोब्बर पार्यो । साम्सुनाहारले पेनाल्टी क्षेत्रअघि बल खोसेपछि कप्तान सविना खातुनले कृष्णारानीलाई थ्रु पास दिइन् । कृष्णाले अफसाइड ट्रयाप बिट गर्दै वन भर्सेस वनमा एन्जिलालाई बचाउने कुनै अवसर दिइनन् ।

दोस्रो हाफमा नेपालले विंगर अनिता केसीको स्थानमा सावित्रा भण्डारीलाई मैदान पठाएको थियो । ४७ औं मिनेटमा अमृता जैशीको हेडरलाई गोलरक्षक रुपनाले मुस्किलले बचाइन् । ५२ औं मिनेटमा नेपालले खेलमा फर्कने सुवर्ण अवसर खेर फाल्यो । अनिता बस्नेतको क्रसमा पेनाल्टी क्षेत्रभित्र अनमार्क रहेकी रश्मीकुमारी घिसिङले हेडरलाई पोस्टको दिशा दिन सकिनन् ।

६८ औं मिनेटमा सावित्राले पेनाल्टी क्षेत्रभित्र डिफेन्डर र गोलरक्षकको बीचबाट गरेको प्रहारमा रुपनाले उत्कृष्ट बचाउ गरिन् । ७० औं मिनेटमा नेपाल खेलमा फर्कियो । अनिता बस्नेतले अअमिशा कार्कीको पासमा गोल गर्दै स्कोर २-१ बनाइन् ।

७४ औं मिनेटमा अनिता बस्नेतको कर्नरमा सावित्राको प्रहार पोस्टभन्दा थोरैले बाहिरियो । ७७ औं मिनेटमा कृष्णारानीले व्यक्तिगत दोस्रो गोल गरिन् । मिडफिल्डमा नेपालले बल गुमाएपछि अघि बढेको काउन्टर अट्याकमा कृष्णाले गोलरक्षकलाई कुनै अवसर नै दिइनन् ।

८० औं मिनेटमा नेपालले प्रिती राइको स्थानमा रेखा पौडेललाई मैदान प्रवेश गरायो । ८२ औं मिनेटमा दीपा शाहीले झन्डै २५ यार्ड टाढाबाट गरेको प्रहार गोलरक्षक रुपनाले सहजै बचाइन् ।