प्रकाश तिमल्सिना, काठमाडौं

पुरुष फुटबलमा नेपाल र बंगलादेशको थुप्रै संयोग छन् । दक्षिण एसियाली खेलकुद (साग) तत्कालिन दक्षिण एसियाली महासंघिय खेलकुद (साफ) मा सिनियर टोलीले खेल्दा नेपाल र बंगलादेश दुवै समान दुई पटक च्याम्पियन बनिसकेका टोली हुन् । दुई टोलीले अन्तिम पटक उपाधि जित्दा एकअर्काको भूमिमा जितेका थिए ।

साफमा नेपालले पछिल्लो पटक उपाधि जितेको सन् १९९३ को छैटौं संस्करण हो। आठौं संस्करणको उपाधि बंगलादेशले नेपालमा जितेको थियो। सागको छैटौंमा नेपाल र आठौंमा बंगलादेशको सिनियर टोलीले जितेको ती नै अन्तिम उपाधि हुन् ।

नवौं (सन् २००४) संस्करणबाट यू २३ टोलीले सागमा प्रतिस्पर्धा गर्दै आएका छन्। यू २३ ले साग खेलेयता नेपाल १२ औं र १३ औं संस्करणको च्याम्पियन बन्यो । अहिले दक्षिण एसियाली स्तरीय प्रतियोगितामा पुरुष सिनियर टोलीले खेल्ने एकमात्र प्रतियोगिता साफ च्याम्पियनसिप मात्रै हो । महिलातर्फ भने साग र साफ च्याम्पियनसिप दुवैमा सिनियर टोलीले खेल्ने प्रतियोगिता हुन् ।

दशरथ रंगशालामा सोमबार हुने महिला साफ च्याम्पियनसिपको फाइनलमा नेपाल र बंगलादेशबीच प्रतिस्पर्धा हुँदैछ । यी दुई देशका महिला टोलीले फाइनलमा पहिलो पटक एक अर्काको सामना गर्दैछन् । तर, समग्रतामा हेर्ने हो भने दशरथ रंगशालामा नेपाल र बंगलादेशबीच तेस्रो पटक फाइनल हुँदैछ ।

नेपाल र बंगलादेशका पुरुष टोलीले दशरथ रंगशालामा यसअघि दुईपटक फाइनल खेल्दा एउटामा नेपाल र अर्कोमा बंगलादेश विजयी भएको थियो । सन् १९९४ को सागको पहिलो संस्करणमा नेपालले उपाधि घरमै राखेको थियो । सन् १९९९ मा सागको आठौं संस्करणमा भने घरेलु टोलीलाई निराश पार्दै बंगलादेश च्याम्पियन बनेको थियो । पहिलो सागको फाइनलमा नेपालले बंगलादेशलाई ४–२ ले हराएको थियो । आठौं सागमा नेपाल बंगलादेशसँग १–० ले निराश भएको थियो । त्यति बेला टोलीका महत्त्वपूर्ण सदस्य मध्येका एक कुमार थापा अहिले महिला टोलीको मुख्य प्रशिक्षक छन् ।

नेपाल र बंगलादेशबीच फुटबल फाइनलमा महिनाको पनि संयोग जुरेको छ । तीन वटै फाइनल असोजमै परका छन् । पहिलो सागको फाइनल २०४१ साल असोज ७ गते, आठौं सागको फाइनल २०५६ असोज १७ र यसपटक असोज ३ गते फाइनल परेको छ । पछिल्लो ३८ वर्षमा दशरथ रंगशालामा नेपाल र बंगलादेशबीच नै चौथो पटक फाइनल हुँदैछ ।

यसअघि पुरुष सिनियर टोलीले तीन पटक खेलिसकेका छन् भने महिला टोली पहिलो पटक खेल्दैछन् । पुरुषतर्फ पहिलो साग, आठौं साग पनि नेपाल र बंगलादेशबीच नै भएको थियो । २०७७ चैतमा नेपाल र बंगलादेशबीच नै थ्री नेसन्स कपको फाइनल भएको थियो । त्यसमा नेपाल २–१ ले विजयी भएको थियो । यद्दपी त्यो आधिकारिक अन्तर्राष्ट्रिय प्रतियोगिता भने थिएन ।

महिला एएफसी यू १४ च्याम्पियनसिपको फाइनल नेपाल र बंगलादेशबीच दशरथ रंगशालामा तय थियो । तर २०७२ वैशाख १२ को विनाशकारी भूकम्पका कारण त्यो फाइनल हुन सकेन । सोही वर्ष नेपाली सेनाको लगनखेलस्थित मैदानमा भएको फाइनलमा बंगलादेशले नेपाललाई १–० ले हराएको थियो । त्यति बेला टोलीमा रहेका बंगलादेशका ८ खेलाडी र प्रशिक्षण टोली अहिले साफ च्याम्पियनसिपको टोलीमा छन् ।

पुरुष फुटबलमा पहिलो अन्तर्राष्ट्रिय उपाधि जितेको ३८ वर्षपछि सोही दशरथ रंगशालामा महिला टोलीले पहिलो अन्तर्राष्ट्रिय उपाधि जित्ने अवसर पाएको छ । अब त्यसमा कति खरो उत्रन्छ त्यसका लागि सोमबार साँझ सम्म प्रतीक्षा गर्नुपर्ने हुन्छ ।

दशरथ रंगशालामा नेपाल र बंगलादेशबीचको फाइनल

२०४१ साल असोज ७ गते

पहिलो दक्षिण एसियाली महासंघिय खेलकुद (नेपाल ४–२ बंगलादेश)

२०५६ असोज १७ गते

आठौं दक्षिण एसियाली महासंघिय खेलकुद ( नेपाल ०– १ बंगलादेश )

२०७९ असोज ३ गते
महिला साफ च्याम्पियनसिप (नेपाल ? बंगलादेश ?)