काठमाडौं (हाम्रो खेलकुद)– दशरथ रंगशालामा जारी महिला साफ च्याम्पियनसिपको फाइनल खेल सोमबार साँझ ५:०० बजे सुरु हुनेछ । फाइनलमा नेपाल र बंगलादेशबीच प्रतिस्पर्धा हुनेछ । यी दुई पहिलो पटक फाइनल एक अर्काको सामना गर्दैछन् ।

भदौ २१ गते देखि सञ्चालन भएको च्याम्पियनसिपमा दक्षिण एसियाका सातै राष्ट्रको सहभागिता थियो । समूह एमा ४ र समूह बीमा ३ टोली थिए । दुई खेल भएको दिन दिउँसो १:०० बजे र साँझ ५:३० बजे सुरु गरिएको थियो । दिनमा एक मात्र खेल पनि साँझ ५:३० मै सुरु गरिएको थियो ।

अखिल नेपाल फुटबल संघ (एन्फा) ले फाइनलमा लागि पनि समूह चरण र सेमिफाइनलकै टिकट दर यथावत राखिएको छ । एन्फाले भिआइपीतर्फ ५ सय र साधारण प्यारापिटतर्फ ३ सय रुपैयाँ टिकट दर तय गरेको थियो । फाइनलमा टिकट मुल्य बढाउने छलफल भएपनि यथावत राख्नेमा सहमति जुटेको बताइएको छ । यसअघिका कतिपय प्रतियोगिताको फाइनलमा टिकट दर बढाइएको थियो ।

महिला साफ च्याम्पियनसिपको १२ वर्ष लामो इतिहासमा पहिलो पटक भारत विनाको फाइनल हुँदैछ । भारतसँग अघिल्ला ५ संस्करणका फाइनलमा ४ पटक नेपाल र एक पटक बंगलादेशले प्रतिस्पर्धा गरेको थियो । पाँचै पटक भारत च्याम्पियन बनेको थियो । यसपटक नेपाल र बंगलादेशमध्ये जुन टोली विजयी भएपनि नयाँ च्याम्पियन हुनेछ ।

प्रतियोगितामा नेपाल र बंगलादेश दुई टोली अपराजित छन् । यी दुई टोलीले उच्च प्रदर्शन गरिरहेका छन् । नेपाल र बंगलादेश दुवै टोली पहिलो पटक भारतलाई हराउन सफल भएका छन् । समूह चरणमा बंगलादेशले भारतलाई ३–० ले हराएको थियो । नेपालले भारतलाई सेमिफाइनलमा १–० ले निराश पारेको थियो ।

समूह चरणमा नेपालले भुटानलाई ४–० र श्रीलंकालाई ६–० ले हराएको थियो । अर्कोतर्फ भारतलाई हराउनुअघि समूह चरणमा माल्दिभ्सलाई ३–० र पाकिस्तानलाई ६–० ले हराएको थियो । सेमिफाइनलमा बंगलादेशले भुटानको चुनौतीलाई ८–० ले हराएको थियो । सन् २०१० मा सुरु भएको च्याम्पियनसिपको चौथो संस्करणमा बंगलादेशले भारतसँग फाइनल खेलेको थियो । बाँकी सबै संस्करणमा नेपाललाई हराउँदै भारतले हराउँदै च्याम्पियन बनेको थियो ।