काठमाडौं (हाम्रो खेलकुद)– महिला साफ च्याम्पियनसिपको समूह चरण र सेमिफाइनलकै टिकट दर फाइनलका लागि यथावत राखिएको छ ।

अखिल नेपाल फुटबल संघ (एन्फा) ले नेपाल र बंगलादेशबीच सोमबार हुने फाइनलका लागि सोही दर भिआइपीतर्फ ५ सय र साधारण प्यारापिटतर्फ ३ सय रुपैयाँ टिकट दर यथावत राखेको हो । फाइनलमा टिकट मुल्य बढाउने छलफल भएपनि यथावत राख्नेमा सहमति जुटेको बताइएको छ ।यसअघिका कतिपय प्रतियोगिताको फाइनलमा टिकट दर बढाइएको थियो ।

साफ च्याम्पियनसिपमा नेपाल र बंगलादेशबीच पहिलो पटक फाइनल खेल हुँदैछ । प्रतियोगिताको १२ वर्ष लामो इतिहासमा पहिलो पटक भारत विनाको फाइनल हुँदैछ । भारतसँग अघिल्ला ५ संस्करणका फाइनलमा ४ पटक नेपाल र एक पटक बंगलादेशले प्रतिस्पर्धा गरेको थियो । पाँचै पटक भारत च्याम्पियन बनेको थियो । यसपटक नेपाल र बंगलादेशमध्ये जुन टोली विजयी भएपनि नयाँ च्याम्पियन हुनेछ ।

दशरथ रंगशालामा जारी च्याम्पियनसिपमा नेपाल र बंगलादेश दुई टोली अपराजित छन् । यी दुई टोलीले उच्च प्रदर्शन गरिरहेका छन् । नेपाल र बंगलादेश दुवै टोली पहिलो पटक भारतलाई हराउन सफल भएका छन् । समूह चरणमा बंगलादेशले भारतलाई ३–० ले हराएको थियो । नेपालले भारतलाई सेमिफाइनलमा १–० ले निराश पारेको थियो ।

समूह चरणमा नेपालले भुटानलाई ४–० र श्रीलंकालाई ६–० ले हराएको थियो । अर्कोतर्फ भारतलाई हराउनुअघि समूह चरणमा माल्दिभ्सलाई ३–० र पाकिस्तानलाई ६–० ले हराएको थियो । सेमिफाइनलमा बंगलादेशले भुटानको चुनौतीलाई ८–० ले हराएको थियो । सन् २०१० मा सुरु भएको च्याम्पियनसिपको चौथो संस्करणमा बंगलादेशले भारतसँग फाइनल खेलेको थियो । बाँकी सबै संस्करणमा नेपाललाई हराउँदै भारतले हराउँदै च्याम्पियन बनेको थियो ।