काठमाडौं (हाम्रो खेलकुद) – छैटौं महिला साफ च्याम्पियनसिप अन्तर्गत पहिलो सेमिफाइनलमा बंगलादेश र भुटान खेल्दैछन् । खेलको पहिलो हाफमा बंगलादेश ४-० ले अघि छ ।

दशरथ रंगशालामा जारी खेलको दोस्रो मिनेटमै बंगलादेशले अग्रता लियो । मोसमत जाहान सोपनाले गोल गर्दै बंगलादेशलाई अग्रता दिलाइन् । मिडफिल्डमा भुटानले बल फुस्काएपछि मोनिका चक्माले पहिलो टचमै छरितो पास दिँदै सोप्नालाई अघि बढाइन् । सोप्नाले अफसाइड ट्रयाप बिट गर्दै गोलरक्षकलाई छक्याउँदै खाली पोस्टमा गोल गरिन् ।

खेलको १६ औं मिनेटमा सोप्ना चोट बोक्दै बाहिरिइन् । त्यसका बाबजुद दुई मिनेटपछि नै बंगलादेशले अग्रता दोब्बर पर्यो । मारिया मान्दाले मिडफिल्डमा बल खोसेर एक डिफेन्स पार गर्दै उत्कृष्ट पास खेलाइन् । कप्तान सविनाले अफसाइड ट्रयाप बिट गर्दै उनको पास नियन्त्रणमा लिइन् । त्यसपछि अघि बढेकी गोलरक्षकलाई बिट गर्दै सविनाले कठिन एंगलबाट फिनिस गरिन् ।

३० औं मिनेटमा बंगलादेशले श्रीमती कृष्णारानी सरकारको गोलमा ३-० को अग्रता लियो । बेन्चबाट सोप्नाको स्थानमा आएकी ऋतु पोर्ना चक्माको क्रसमा कृष्णारानीले हेडरमार्फत गोल गरिन् । ३५ औं मिनेटमा ऋतुले अर्को गोल थपिन् । उनको पहिलो प्रहार गोलरक्षक संगीता मोंगरले बचाएपनि रिबाउन्ड उनको खुट्टामा पुग्दा ऋतुले दोस्रो प्रहारमा गोल गरिन् ।

आज हुने दोस्रो सेमिफाइनलमा साविक विजेता भारत र नेपाल भिड्नेछन् । खेल रंगशालामा साँझ ५:३० बजे सुरु हुनेछ ।

यो पनि : नेपाल विरुद्ध भारत : मिडफिल्ड युद्धमा खेलको छिनोफानो