एजेन्सी – इटालियन क्लब रोमाले युरोपा लिगमा सहज जित दर्ता गर्दा अर्काे इटालियन क्लब लाजियोले लज्जास्पद हार बेहोरेको छ ।

घरेलु मैदानमा रोमाले १० खेलाडीमा समेटिएको फिनल्यान्डको एचजेकेलाई ३–० ले पराजित गरेको हो । रोमाको सहज जितमा पाउलो डिबाला, लोरेन्जो पेलिग्रेनी र एन्ड्रिया बेलोट्टीले गोल गरे । सबै तीन गोल दोस्रो हाफमा भएको थियो ।

रोमामा बिहीबार राति भएको खेलको १४औं मिनेटमा नै एचजेके १० खेलाडीमा समेटिन पुगेको थियो । मिरो टिन्होले बेलोट्टीलाई फउल गरेपछि रेफ्रीले भिएआरको सहायता लिदै उनलाई रातो कार्ड देखाएर मैदान बाहिर पठाएको थियो ।

एचजेके १० खेलाडीमा समेटिएपनि रोमाले त्यसको फाइदा दोस्रो हाफमा उठाउन सफल भयो । ४७औं मिनेटमा डिबालाले गोल गर्दै रोमालाई १–० को अग्रता दिलाए । उनले लोरेन्जो पेलिग्रेनीको पासमा गोल गर्न सफल भएका थिए । त्यसको दुई मिनेटपछि लोरेन्जो पेलिग्रेनीले गोल गर्दै रोमाको अग्रता दोब्बर पारे ।

६८औं मिनेटमा एन्ड्रिया बेलोट्टीले निकोलो जानिलोको पासमा गोल गर्दै रोमाको जित पक्का गरे । रोमाको यो पहिलो जित हो । यस जितसँगै रोमा दुई खेलबाट ३ अंक जोडेर तेस्रो स्थानमा रहेको छ ।

समान ३ अंक नै रहेपनि लुडोगोरेट्स राजग्राड दोस्रो स्थानमा छ । पराजित एचजेकेले अंकको खाता खोल्न सकेको छ । यही समूहको अर्काे खेलमा स्पेनिस क्लब रियल बेटिसले बुल्गेरियाको लुडोगोरेट्स राजग्राडलाई ३–२ ले पराजित गरेको छ ।

अर्काे खेलमा इटालियन क्लब लाजियोले डेनमार्कको मिट्जेल्यान्डसँग ५–१ को लज्जास्पद हार बेहोरेको छ । मिट्जेल्यान्डको जितमा पाउलिन्हो, सोरी कावा, इभान्डर फेरेइरा, गुस्ताव इसाकसेन र एरिकले गोल गरे । लाजियोका सेरगेज मिलिन्कोभिक साभिकले एक गोल फर्काए ।

अन्य नतिजा
एफसी सेरिफविरुद्ध म्यानचेस्टर युनाइटेड (०–२), फियोनुर्डविरुद्ध स्ट्रम ग्राज (६–०), मोनाकोविरुद्ध फेरेन्कभारोस (०–१), ओलम्पियाकोसविरुद्ध फ्रेइवर्ग (०–३), क्वारावागविरुद्ध नान्टेस (३–०), रियल सोसिडाडविरुद्ध ओमोनिया (२–१), ट्रावजोन्सपरविरुद्ध एफके क्रेभेना जेभेज्दा (२–१), बोडो/ग्लिम्टविरुद्ध एफसी जुरिच (२–१), ब्रागाविरुद्ध युनियन बर्लिन (१–०), डाइनामो किएभविरुद्ध एइके लारनाका (०–१), रियल बेटिसविरुद्ध लुडोगोरेट्स राजग्राड (३–२), रेनेसविरुद्ध फेनरवाच (२–२) र युनियन सेन्ट गिल्लोइसविरुद्ध माल्मो (३–२)