सुशिल पन्त, चितवन

त्रिभुवन आर्मी फुटबल क्लब नारायणगढको क्याम्पाचौरमा जारी इसुजु चितवन गोल्डकपको सेमिफाइनलमा प्रवेश गरेको छ । सिमराको नव जन जागृती युवा क्लबलाई बिहीबार ३–२ हराउँनै आर्मी अन्तिम चारमा पुगेको हो ।

आर्मीको जितमा कप्तान जर्ज प्रिन्स कार्की, विमल पाण्डे र सुदील राईले गोल गरे । नव जन जागृतीका सुरेश कुमाल र अनिश चौधरीले गोल फर्काए । १६ औं मिनेटमा जर्ज प्रिन्सको गोलबाट आर्मीले अग्रता लिएको थियो । २२ औं मिनेटमा नव जन जागृती सुरेशले बराबरी गोल फर्काए । २६ औं मिनेटमा विमलले गोल गरेपछि पहिलो हाफमा आर्मीले २–१ को अग्रता लियो ।

दोस्रो हाफको सातौं मिनेटमा सुदीलले गोल गर्दै आर्मीको अग्रता लम्बाए । दोस्रो हाफको १९ औं मिनेटमा नव जन जागृतीले पेनाल्टी पायो । आर्मीका खेलाडीले डिबक्स भित्र ह्याण्ड गरेपछि रेफ्रीले सिमरालाई पेनाल्टी दिए । अनिशले पेनाल्टीमा गोल गरे पनि हार टार्न सकेनन् । आर्मीका जर्ज प्रिन्स म्यान अफ दि म्याच भए र उनले १० हजार रुपैयाँ प्राप्त गरे ।

फाइनल प्रवेशका लागि शुक्रबार मनाङ र एपिएफ तथा शनिबार आर्मी र एभिनर भिड्नेछन् । भरतपुर फुटबल क्लबको आयोजनामा जारी गोल्डकपको फाइनल असोज ३ गते हुनेछ । गोल्डकप विजेताले ७ लाख र दोस्रो हुने टोलीले ३ लाख ५० हजार रुपैयाँ प्राप्त गर्नेछ ।