काठमाडौं (हाम्रो खेलकुद)– बाह्र वर्षको इतिहास बोकेको महिला साफ च्याम्पियनसिपको इतिहासमा नेपालले दोस्रो पटक सेमिफाइनलमा भारतको सामना गर्नुपर्ने भएको छ ।

दशरथ रंगशालामा जारी च्याम्पियनसिपअन्तर्गत समूह चरणको अन्तिम खेलमा मंगलबार सबै संस्करणको च्याम्पियन भारतले बंगलादेशसँग ३–० को अप्रत्यासित हार बेहोरेपछि अन्तिम चारमा नेपालसँगको भेट पक्का भएको हो ।

समूहका सबै खेलमा जित निकालेको बंगलादेश समूह एको विजेता बन्दै अघि बढ्दा भारत भने उपविजेतामा सिमित भयो । एको उपविजेता भारतले समूह बीको नेपालको सामना गर्ने छ भने अर्को सेमिफाइनल बंगलादेश र भुटानबीच हुनेछ । भुटानलाई ४–० र श्रीलंकालाई ५–० ले हराउँदै नेपाल समूह बीको विजेता बनेका थियो । बंगलादेशसँग नमिठो हार बेर्होनुअघि भारतले पाकिस्तानलाई ३–० र माल्दिभ्सलाई ९–० ले हराएको थियो ।

यसअघि सन् २०१६ मा भारतमा भएको चौथो संस्करणमा पनि नेपाल र भारतबीच सेमिफाइनलमा भेट भएको थियो । जसमा नेपाल ३–१ ले पराजित भएको थियो । त्यसबाहेकका सबै फाइनलमा नेपाल र भारत नै भिड्दै आएका छन् । जसमा नेपाल सधै पराजित भएको थियो ।

सेमिफाइनलमा नेपाल र भारतको दोस्रो भेटमा केहि संयोग पनि मिलेको छ । नेपाल र भारतको अन्तिम चारको भेटमा दुवै पटकको कारण बंगलादेश नै बनेको छ । त्यति बेला समूह चरणमा बंगलादेशले भारतलाई गोलरहित बराबरीमा रोकेपछि नेपालसँग सेमिफाइनलमा भिड्नु परेको थियो । त्यहि संस्करणमा अर्को सेमिफाइनल जित्दै बंगलादेश पहिलो पटक फाइनल पुगेको थियो ।

स पटक सबैभन्दा उच्च प्रदर्शन गरेको बंगलादेशले भारतलाई इतिहासमा पहिलो पटक निराश पारेको हो । भारतले छैटौं संस्करणमा आएर पहिलो हार बेहोरेको हो । अर्को संयोजक नेपाली टोलीका प्रशिक्षक हुन् । भारतसँग सेमिफाइनल खेल्नु परेको संस्करणमा कुमार थापा मुख्य प्रशिक्षक थिए । यसपटक घरेलु मैदानमा जारी च्याम्पियनसिपमा पनि उनी थापा टोलीको मुख्य प्रशिक्षक छन् ।

साफको फाइनलमा पहिलो संस्करणमा १–०, दोस्रोमा ३–१, तेस्रोमा ६–० ले भारतसँग पराजित भएको नेपालले २०१६ को सेमिफाइनल नतिजा ३–१ ले सुम्पेको थियो । पाँचौं संस्करणको फाइनलमा भारतसँग नेपाल ३–० ले पराजित भएको थियो ।

भारतसँग लगातारको हारलाई रोक्ने मौका फेरि एक पटक नेपाली टोलीसँग छ । भारतसँगको भेटमा जित निकाल्दै नेपाल पाँचौ पटक फाइनल खेल्छ कि दोस्रो पटक सेमिफाइनलबाट बाहिरिने त्यसका लागि शुक्रबार सम्म प्रतीक्षा गर्नुपर्ने हुन्छ ।

साफ च्याम्पियनसिपमा नेपाल र भारतबीचको नतिजा

वर्ष नेपाल भारत खेल

२०१०, ०-१ फाइनल

२०१२, १-३ फाइनल

२०१४, ०-६ फाइनल

२०१६, १-३ सेमिफाइनल

२०१९, ०-३ फाइनल