काठमाडौं (हाम्रो खेलकुद) – छैटौं साफ महिला च्याम्पियनसिप अन्तर्गत समूह चरणको अन्तिम खेलमा भारत र बंगलादेश भिड्दैछन् । पहिलो हाफमा बंगलादेशले २-० को अग्रता लिएको छ ।

पहिलो हाफको सुरुवातदेखि नै आक्रामक देखिएको बंगलादेशले पटक पटक भारतको डिफेन्सलाई समस्या दिएको छ । भारतले भने तुलनात्मक रुपमा कम बल पोसेसन पाएको छ । काउन्टर अट्याकमा पाएको थोरै आक्रमणमा पनि भारत निकै कमजोर देखिएको छ । बंगलादेशका लागि दुवै फरवार्डले गोल गरेका छन् ।

सातौं मिनेटमा बंगलादेशले बल पोस्टभित्र छिराएपनि गरेपनि रेफ्रीले त्यसलाई गोलको मान्यता दिइनन् । क्रसबाट आएको बललाई बंगलादेशका फरवार्डले नियन्त्रण गर्ने क्रममा गोलरक्षकमाथि फल गरेपछि रेफ्रीले फलको निर्णय सुनाइन् । नवौं मिनेटमा रतनबाला देवी नोङमाइथेमले पेनाल्टी क्षेत्र बाहिरबाट गरेको प्रहार गोलरक्षक रुपना चक्माले दोस्रो प्रयासमा बचाइन् ।

खेलको ११ औं मिनेटमा बंगलादेशले अग्रता लियो । मोसमात सिराज जाहान सोप्नाले गोल गर्दै बंगलादेशलाई अघि बढाएकी थिइन् । उनले कृष्णारानी सरकारको प्रहारलाई दुई डिफेन्सको चुनौती पार गर्दै पेनाल्टी क्षेत्र भित्रबाट फिनिस गरिन् ।

खेलको २३ औं मिनेटमा बंगलादेशले अग्रता दोब्बर पार्यो । कृष्णारानीले पेनाल्टी क्षेत्रभित्र दुई डिफेन्डरको बीचमा बल अघि बढाउँदै गोलरक्षक अदिति चौहानविरुद्ध उत्कृष्ट फिनिस गरिन् । सोप्नाको पासलाई दबाबका बीच नियन्त्रणमा लिँदै कृष्णारानीले सुन्दर गोल गरिन् ।

यस समूहबाट भारत र बंगलादेश यसअघि नै सेमिफाइनलमा प्रवेश गरिसकेका छन् । भारतले पहिलो खेलमा पाकिस्तानलाई ३-० र दोस्रोमा माल्दिभ्सलाई ९-० ले हराएको थियो । बंगलादेशले पहिलो खेलमा माल्दिभ्सलाई ३-० तथा पाकिस्तानमाथि ६-० को जित दर्ता गरेको थियो । आजको खेलमा बंगलादेश विजयी भए समूह विजेता बन्नेछ ।

नेपाल समूह ए बाट विजेताको रुपमा सेमिफाइनलमा प्रवेश गरिसकेको छ । नेपालले अब फाइनल प्रवेशका निम्ति समूह ए को उपविजेताको सामना गर्नेछ । नेपालको समूहबाट भुटान उपविजेता बन्दै अघि बढेको छ ।